O nisi o suli ole suafa Matai‘a o Faleata ao tapena ni lafo tupe mo le tapuaiga ale itumalo o Faleata ina ua maea ona lau le faaiuga ole faamasinoga o talosaga apili ile Aso Faraile, 24 o Fepuari 2017

O nisi o suli ole suafa Matai‘a o Faleata ao tapena ni lafo tupe mo le tapuaiga ale itumalo o Faleata ina ua maea ona lau le faaiuga ole faamasinoga o talosaga apili ile Aso Faraile, 24 o Fepuari 2017

Ua taoto nei i lagotonu upu ole aiga Sa Mataia i Faleata ina ua aumai le faaaiuga ale Faamasinoga o Talosaga toe iloilo poo le faamasinoga apili e faasino ile faaiuga ale faamasinoga maualalo o Fanua ma Suafa na suesueina talosaga na faaulu e saili ai suli faavae ole suafa Matai‘a o Faleata.

Ua manino mai ile faaiuga na fofogaina ile Aso Faraile ua mavae, 24 o Fepuari 2017, e tolu lava suli faavae ole tasi lenei o suafa faasa‘osa‘o, ose Tapaau ole itumalo o Faleata ua na‘o suli o Leasiolagi, Alipuupuu ma Uilaefa.

Ole suesuega na agai i talosaga e fā na faaulu na toe fesiligia ai le faaiuga ale faamasinoga maualalo na faatumau ai iuga o isi faamasinoga o lenei suafa, na manino ma mautu ai e na‘o le toatolu lava suli e faasino ile suafa Matai‘a o Faleata ma oi latou uma e suli mai i usuga e tolu ale tamaitai o Tusoloimalie.

E lē gata ina faamautu nei ele faamasinoga o talosaga e na‘o le tolu lava suli, ae sa silasila foi le faamasinoga i lana suesuega pe iai se Matai‘a i Vaitele pe na‘o Vaimoso lea oloo faasino iai nisi o faaiuga mulimuli mai e pei ole faaiuga na faia ile tausaga e 1986, na faapea mai ai le faamasinoga i sana faaiuga ise tasi o mataupu sa suesueina e faasino ile suafa Matai‘a, e moni sa iai Nofo ile suafa i Vaitele i tausaga e tele ua mavae, ae mo le taimi nei oloo nofoia e Matai‘a Visesio le suafa i suli o Leasiolagi, e agai uma suli o Uilaefa i Vaimoso ma ua lē toe iai se Matai‘a i Vaitele.

Ose tasi lea o finauga ua loa tausaga o finau ai suli e toatolu lea sa piiama ma lagolago suli o Alipuupuu o suli uma e tapuvae tasi i Vaimoso ile nofoaga oloo iai le tulaga maota o Vaiala e fasino iai le Matai‘a o Faleata.

Peitai ole mātau ale faamasinoga i lana suesuega sa finau suli o Uilaefa e ese le Matai‘a o Vaimoso, ese le Mataia o Vaitele auā sa nofolua Matai‘a Europa i suli o Lesiolagi ma Matai‘a Siu i suli o Uilaefa sa tausia le aiga.

Oloo iai foi faaiuga ale faamasinoga sa lua nofo ile suafa i nisi o tausaga mamao atu i tua, lea sa nofo mai ai Matai‘a Patauave na tofia ile Pule ale suafa Tamasese sa iai muamua le pule ole suafa, faapea Matai‘a Umuesi i suli o Uilaefa. Ole taunuuga ole finauga na toe tuuina atu ile faamasinoga o talosaga apili ua aumai ai ma se tasi o vaega ole faaiuga, ua maapeape ai filifiliga a suli, ma ole a tofu ai suli ma le Nofo e tausia suli ua faasino iai le suafa Matai‘a ma ua faaitupaepae ai ma le suafa.

O lona uiga e lē toe aiāina ele isi suli le filifiliga ale isi. Ua aumai foi ile faaiuga ale faamasinoga apili le faalēaogāina ole vaega ole faaiuga ale faamasinoga na faia i le 1986 lea na faapea mai ai e ui sa iai Nofo ile suafa i Vaitele ae ua tasi uma i Vaimoso.

Ole faataotoga ua iai nei o suafa Matai‘a o suli o Leasiolagi ma Alipuupuu e faasino i Vaimoso, ae ole Nofo ile suafa i suli o Uilaefa ua faasino lava i Vaitele.

Ua poloaina ele faamasinoga o talosaga i lana faaiuga, Nofo e tolu ole a filifilia e suli taitasi ina ia soalaupule le mataupu i eleele ole aiga ma ia vaevae fanua ua aiātutusa iai suli e tolu. Faaalia ese tasi o matai ole itumalo ua lē finagalo e faailoa lona suafa, o lea ua aumai ele faamasinoga le taotoga filemu ole aiga Sa Matai‘a i Faleata, ma o lona lagona ose faaiuga ole a nofo filemu ai le aiga aemaise ole lagolago foi lea ale itumalo ile finagalo ua aumai ele faamasinoga.

Faaalia ese tasi o suli ole suafa ua loaloa tausaga ma aso o oia pea upu ole lotoifale ole aiga i ona suli ile faamasinoga ona ole feteenai o nisi o faaiuga na muamua faia ele faamasinoga ma faaiuga na mulimuli mai ai.

Ole finagalo foi lea ole faamasinoga i lana faaiuga ile talosaga apili ua feteenai nisi o faaiuga na muai faia ma faaiuga na mulimuli faia e le faamasinoga o Fanua ma Suafa.

Ole mafuaaga foi lea ole faaleaogāina ole faaiuga ole 2011 ma se vaega ole faaiuga na faia ile tausaga e 1986.

Oloo fuafua suli e toatolu e faia se latou feiloaiga faatasi e soalaupule ai upu o lo latou lotoifale ina ua mae‘a ona faataoto mai le faaiuga ale faamasinoga apili o Fanua ma Suafa ua lē toe feaiāa‘i ai suli e tolu ia latou filifiliga mo ni Nofo e tausia aiga potopoto ole suafa i ona suli e toatolu.

O suli o Alipuupuu ua leva tausaga e lei toe iai se Nofo e faapea foi i suli o Uilaefa ua silia ile 30 tausaga o avanoa le Nofoa o Tavita.

O suli o Leasiolagi sa seei ai ile suafa le susuga Matai‘a Visesio ua tuumalo.

Comments

comments