Ua manino mai nei ma maioio le tulaga ua iai nisi o aulotu se tolu sa i lalo o le faamalu a le Ekalesia Metotisi Fou a le Atua, ua toe faasee tuagalu mai ma lea Faavae, ae latou amataina le isi Ekalesia fou ua faaigoaina o le Ekalesia Kerisiano Soofaatasi a le Atua.
O le uiga o lea igoa, o tagata uma o le ekalesia e mai ituaiga eseese, poo le mafutaga a le fanau a le Atua ua tuufaatasia e ala i le Ekalesia.
O le aulotu i Papatoetoe o loo galulue ai le susuga i le faafeagaiga ia Fatu Manu ma le faletua ia Kuini Manu. O Henderson o loo faifeau ai le susuga i le faafeagaiga ia Rev Mafua Kolose Tagaloa ma le faletua ia Lupe Tagaloa, ma le aulotu e tasi mai Samoa i Vaitele o loo vaaia e le aoao ia Meaalofa Hakai i le taimi nei.
O le mae‘a ai o le lauina o le tusi tofiga ia Mati i le tausaga nei na auaufaatasi ai loa aulotu e tolu ua alagatatau ona o ese mai ma lea faamalu ona ua lē savali le Ekalesia i ana taiala e pei ona sa faataoto mai ai le galuega i le amataga.
O le taeao o le Aso Toonai ua mavae, 28 o Novema na amata ai se fono laitiiti a nei ekalesia e saili ai se igoa e faaigoa ai le lotu ma lesitala ai le ekalesia ina ia aloaia ai i tulafono a Niu Sila aemaise ai le malo o Samoa.
Ma sa filifili ai foi ma nofoatofi e taitaia le galuega ma ona faavae e fai ma taiala ma alafua e agai i ai le lotu. Na auai uma matafale o aulotu e lua i Niu Sila nei i lea fonotaga faatasi ai ma sui e toatoatolu mai Samoa.
O nisi o mataupu na iloiloina i lea fonotaga o le faamāmā avega lea i aiga lotu, e ala i le taofia o le aganuu a Samoa pe a fai ni faalavelave i totonu o le Ekalesia. Ae lē gata i lea ua manino ai le susuga le faafeagaiga ia Rev Fatu Manu ma le faletua ia Kuini ua avea ma taitai aoao o le Ekalesia, o Rev Mafua Kolose Tagaloa ma le faletua ia Lupe Tagaloa ua fai ma failautusi ae o le aoao mai Samoa ia Meaalofa Hakai o le Teutupe.
O le Aso Sa na faamae‘a ai lea fonotaga i le sauniga tuufaatasi i le Ekalesia a Papatoetoe, ma faauu ai ma le susuga ia Rev Mafua Kolose i lana tusipasi o le Certificate in Theology mo le galuega faafaifeau, e lua tausaga na aotauina ai lea auauna i le kolisi o St John’s Theological College i Meadowbank.
O le susuga i le alii pule o le kolisi ia Dr Frank Smith na saunoa faafetai i le faafeagaiga ia Mafua Kolose i le onosai ma le filiga ua tini ma tau lau o lona faamoemoe, ae faapea foi i le tapuaiga i aiga ma ekalesia sa tu‘i le mulipapaga ma fai le faiva o le tapuai.
O se tasi o tamā matua o le Ekalesia i Papatoetoe ia Lemalu Masinalupe Tupaipa na ia tauaaoina le tusipasi a le susuga le faafeagaiga. Na saunia foi le tatalo faapitoa e le taitai o le ekalesia ia Rev Fatu Manu ma le aufaigaluega, faapea le faifeau malolo manumalo ia Silipa Mamea mo le faafeagaiga ia Mafua Kolose.
O le fiafiaga ma le mitamitaga i tagata lolotu ma susuga i faafeagaiga ua iai se amataga fou poo se taeao fou ua toe amatalia ai le galuega ale Atua, ae ua o faatasi ma le faaeaina o le tausinioga a le susuga le faafeagaiga ia Mafua Kolose.
O le Ekalesia Kerisiano Soofaatasi a le Atua ua iai le faamoemoe e fia faatu se isi galuega fou i Brisbane Ausetalia.
