Tolu afi fou mo le eletise i Savaii

 Afi fou ua faatuina i Salafai
Afi fou ua faatuina i Salafai

E tolu ni afi fou ua faatuina nei i le motu tele i Salafai. O se tasi lenei o galuega tele ua faapea ona fagaioi e le Faalapotopotoga o Malosiaga tau Eletise le EPC ina ia ausia le manaoga o le Malo e oo atu i le tausaga e 2017 ua faaaogā atoa lava e Samoa malosiaga faafouina mo lana eletise.

O se galuega lenei ua faatupe lava e le EPC ona o le manaoga ina ia mautu malosiaga faafouina ma alu sa‘o i afi nei i se taimi vave mo le faasopolia ai o le motu tele i Salafai.

E tusa ma le $2miliona tala Samoa le tau atoa o lenei galuega ma na oka mai i Siamani nei masini ae na tuufaatasia uma i Singapore faatoa aumai ai loa i Salelologa i Savaii. I Samoa lava ia e fā lelei masina na fausia ai e le EPC le nofoaga ua faamautu ai nei ia afi tetele.

O le mau a le malosiaga tau eletise e ola atoa lava Savaii i le mae‘a ai ona faatutu ma toe faaola o lenei galuega tele.

O le taulai lenei ua iai galuega a le EPC i lenei vaitau ona o le manaoga lea ua tautino le Malo o Samoa e tatau ona ausia i le tausaga e 2017, o le ola mai i le malosiaga o le la, o le malosiaga o savili atoa ai le suavai ina ia mautinoa e faaitiitia le faitau miliona tala o loo faaalu e le malo o Samoa i tausaga taitasi e faatau mai ai le suauu auā le gaosiga o le eletise.

O le alii Palemia ma taitai o le Malo na agai atu i Savaii mo le faamanatuina o le vaiaso o le siosiomaga lea na auai atu i Salelologa mo le tatala aloaia o lenei galuega tele e pei ona ia ta‘ua ai le tāua tele o le taumafaiga ua feagai nei ma le Malosiaga tau Eletise i le faasaoina o le tupe faaalu i tausaga uma auā le gaosiga o lenei malosiaga.

O le taimi lenei o le tele lava o le eletise o Samoa o loo gaosi i le suavai ma le suauu ma o le unai lea ua mae‘a faatutu ai nofoaga auā le apoina o le malosiaga o le la i afi tetele eseese i le atunuu lea ua aofia ai ma Savaii.

O isi vaega ua aoina ai le malosiaga o le savili ua faapea foi ona faatutu i Aleipata ma o le aumai la o afi tetele nei o le a vave ona tino mai ai le manaoga lea ua unai e le Malo i Samoa nei. E to‘a 20 i latou o loo galulue i le afi a le EPC i Salelologa.