Siana Vagana le taupou a Mt Albert Grammar

Siana Vagana le taupou a Mt Albert Grammar

Na lagona le vaivai o le loto ma le faanoanoa o mātua o le tamaitai ia Siana Vagana ina ua la maua le pepa a se tasi o faamasino o le tauvaga o le Polyfestival a le kulupu Samoa, o loo tusia ai se tasi o faaupuga a se faamasino i luga o lana pepa e faapea, ‘Tolotolo soo pei se moetolo poo se gaoi ae le siva mai.’

O le tusitusiga na faailoa ai le lagona faanoanoa o nei mātua ma laua ta’ua ai le tuumāmāina e lenei faamasino o le tapenaga a mātua ma faiaoga aemaise o fanau i totonu o le aoga a Mount Albert. Na ta’ua e le tamā ia Neemia Vagana, e lei faigofie ona la talia lea tusitusiga ona ua aafia o la lagona, aemaise ai o si a la tama ia Siana sa fai ma taupou o le aoga.

Na tagi le tamaitai ia Siana auā ua ia iloa le uiga o nei upu, sa faapea foi ona tagi atu ai ma lona tina, ae sa taumafai le tina e faanā ma faamalosiau i lana tama. O le tala a mātua, sa taumafai lava e folo i totonu le mea ua tupu ae se’i taumafai e faafiafia le loto o le la tama ua aafia.

O le lagona o mātua nei, o laua e tele ina auai ma lagolago i mea e fai i totonu o le aoga aemaise lava i le billigual Samoa, e taumafai foi e faamalosia le la fanau ina ia malamalama ma tausisi e faatāua measina a le atunuu. Peitai ua tupu mai lenei faafitauli ma ua fesiligia ai poo le ā le uiga o nei mea, ae lē faia mo se isi, o loo fai ona o alo ma fanau ina ia latou iloa ma malamalama i le tu ma le aganuu a Samoa.

Afai o loo taia pea i taliga le faaupuga e faapea o tama a manu e fafaga i fuga o laau, ae o tama a tagata e fafaga i upu ma tala, o le ā la le ituaiga upu e tatau ona ave i le tamaititi. I tausaga o le tagata, o iina e tatau ona fua iai ni tala e fai, e lē faapea e taumafai e faatonu le tofa ma moe o loo i faamasino ae o le auga tonu o le uiga o le olaga o fanau mo le lumanai, e tatau ona fai mea uma i luga o le alofa, ina ia aua ne’i musuā le tamaititi.

O le finagalo o mātua ua tatau foi ona sui ni faamasino o lenei tauvaga, e tatau ona aumai ni faamasino na a’osiva e faamasinoina tauvaga, auā o lenei olaga e lē manaomia ni mea tau faasa’osa’o. Ana faapea e silasila le faamasino e lē talafeagai gaioiga a le taupou i lana siva sa tatau foi la ona toe aumai se tusitusiga poo se fautuaga e toe faamalosia ai le tapenaga a le aoga mo le isi tausaga, ae ui i lea ua uma le tauvaga.

Na ta’ua e mātua o Siana, e ui i le manu’a o laua loto i tusitusiga a le faamasino ae lē mafai ona tuua ai lo laua lagolago malosi i mea e fai a le aoga o loo aooga ai le la fanau. O loo ave foi le upu faamalosi i le la tama ina ia aua ne’i faavaivaia ai lona loto i le mea ua tulai mai, aemaise o lafoga ua tusia.

O le vaiaso muamua o le a’e ai o aoga o loo iai le faamoemoe o le komiti a le aoga e faia ai se fono e uiga i lenei mataupu ua taulai mai. Na tapa se finagalo o le komiti o loo gafa ma le tapenaga o le Polyfestival i tausaga taitasi ae na saunoa mai le faletua ia Melegalenuu Ah Sam, e lē mafai ona tuuina mai sana faamatalaga e uiga i lenei mataupu, na te lei maua lelei le mataupu lea, e lei maua foi se feiloaiga a le latou komiti e faatalanoaina ai lenei mataupu. Masalo o se taimi o i luma e maua mai ai se faamatalaga i le latou komiti pe a mae’a se latou feiloaiga.