Taimi ole taaloga a le Toa Samoa ma Egelani - Photos: Getty Images

Taimi ole taaloga a le Toa Samoa ma Egelani – Photos: Getty Images

Ile faatau tui ole taaloga faavaomalo a Samoa ma Egelani na manumalo ai le finau a Egelani i ai 30 – 10.

Malosi tele le taalo ale au mai Peretania e tetee ile mana o tama ale Toa Samoa. Mae na iai ma le avanoa ale Toa e tulei ai lona manao ae maise ai ile ‘afa lona lua. Ile iu ai ole taaloga, sii lima a Egelani ile manumalo ae moe le Toa e toe manatunatu lelei ile ituaiga taaloga e ave ile Ipu ole Lalolagi ile masina o Oketopa.

Na muamua sikoa Egelani ile minute lona lua ole taaloga ina ua sikoa le ‘afa o Luke Gale. Ova le aa sili ai le sa o Egelani 6-0. Faaopoopo isi ai o Egelani ina ua faasala le Toa.

E ui na matua malosi lava foi ma le finau a Egelani, ae na toe faatoa maua le isi ana sikoa ile minute 37 ole taaloga ile sikoa faaopoopo a Stefan Ratchford. Ova le aa ma oo ai ai 14-0. Na foliga faigofie le sikoa lea na maua i lalo ole pou ina ua sao Ratchford ile laina puipui ale Toa.  Ile ‘afa ole taaloga na sili ai Egelani i ai ia, 14-0.

Ae ole amataga ole ‘afa lona lua na sao ai ma le malosi ole Toa ile sikoa a Joey Leilua ile nao le 2 o minute ua uma. Ova ma le aa a Anthony Milford oo ai ai ole taaloga 14-6.

Na toe sao foi Leilua ina ua fiti le polo ile itu ale Toa. E lei maua le laina sikoa. Ae o Egelani na sosoo ile sikoa a Josh Hodgson i lalo foi ole pou. Ova le aa – 20-6 a Egelani.

Toe 12 minute ae maua loa ma le sikoa lona lua  ale Toa ina ua sao Milford ile tulimanu. Misi le aa maua ai ai 20-10.

No sosoo sikoa e lua a Egelani ile taimi mulimuli ole taaloga. O Kevin Brown na sikoa ile toe lima minute o totoe ole taaloga. Ova le aa maua ai ai 26-10 ia Egelani. Na toe itiiti lava maua le isi sikoa a Milford mo Samoa peitai, na toe foi ona ole alu i luma ole pasiga.

Mulimuli le tali a Egelani ina ua toe maua le sikoa a Jermaine McGilvary ile toe tolu minute totoe. Ova le aa ma maua ai ai 30-10 a Egelani.

Toa Samoa: 1. Peter Matautia, 2. Ken Maumalo, 3. Joseph Leilua, 4. Timoteo Lafai, 5. Antonio Winterstein, 6. Anthony Milford, 7. Faamanu Brown, 8. Sam Kasiano, 9. Suaia Matagi, 10. Junior Paulo, 11. Junior Matautia, 12. Leeson Ah Mau, 13. Joshua McGuire, 14. John Asiata, 15. Sauaso Sue, 16. Herman Eseese, 18. Pita Godinet.

Comments

comments