O se alii leoleo ile vaega o taavale afi sa faamalolo le tumau mai le amataga o le tausaga ua mavae ona o tuua’iga o lona faia ose gaioiga solitulafono ise tamaitai na avatu mo se suesuega ile le totogia o le taxi na malaga ai, ua toe foi nei i ona tiute faaleoleo ina ua talia e le faamasinoga le talosaga a lana loia e leai se moliaga e tatau ona tali iai le ua molia poo le no case to answer.
Na valaau uma molimau a leoleo oni Malu o le Malo ma le ave taxi e lagolago ai moliaga faasaga ile susuga Leilani Savea o se tane o Uafato Fagaloa ma Faleula uta. O le po o le aso 7 o Ianuari 2016 na ave ai ese taxi se tamaitai ma tuu ile nofoaga faatali pasi i tua ane o le Fili maketi ile te’a o le 12 ile po ua savali ile tasi ile vaveao.
Na aumai e le taxi le tamaitai mai le fale kalapu o le JP ma e faapea mai leoleo e ‘ona le tamaitai ona sa inu ile fale kalapu ma ni ana uo, ae na malaga ese ana uo ae tafao ai lava na o ia, lea na mafua ai ona vili e le fale kalapu le taxi e alu ese ai.
E leai se tupe a le tamaitai e totogi ai lona pasese le mafuaaga na ave ai tuu ile nofoaga faatali pasi. Na logo ai loa ma leoleo lea na agai atu ai le taavale a le ofisa ma alii leoleo e to’alua ma ave le tamaitai ile ofisa mo ni suesuega ile le totogia o lona pasese.
O le vaega o taavale afi na momoli iai le tamaitai lea e faapea na ave ai e le ua molia le tamaitai ile potu ma faatalanoa ai ma faatino loa iai ma ni gaioiga solitulafono.
Na toe momoli e le ua molia le tamaitai ile nofoaga faatali pasi ise taimi lava o lea po ma toe agai ane le ua molia ile ofisa. Peitai o se taimi lava o le po lea na tau atu le tiute a ni alii leoleo se toafa ile tamaitai lava lea ma se isi alii o saofafai i luga o le taligalu. Na toe ave ai le tamaitai ile ofisa ma le alii sa la nofonofo ile taligalu. Ina ua suesueina tuuaiga faasaga ile susuga Leilani e lei manino ile molimau a le tamaitai pe o le tagata tonu lea na faia le gaioiga ia te ia.
E fua i ana tali e le mautonu aemaise o molimau a nisi o alii leoleo sa tiute ile po lea e feteenai ma le ogatasi ma mau tuu fofoga a le tamaitai na aafia.
O le le mafai e le itu a leoleo ona faamaonia ia latou mau o le tagata ua molia o le tagata tonu lea na faia le solitulafono na mafua ai ona talosaga le loia sa finauina le tetee a Leilani Savea mo le faaleaogaina o moliaga ona e leo manino i mau a leoleo o le tagata tonu lea na faia le solitulafono.
Na talia e le faamasinoga le talosaga ona o mau a leoleo ua le mafai ona faamaonia ai moliaga.
