E 160 laau maluana mai le valu inisi le umi e oo i le laau ua ola ma matua ua ta’i valu futu le maualuluga na maua o faafailele e le susuga Taoa Faraimo Stowers o se tane o le nuu o Satapuala.
E le gata o laau faasaina na maua e leoleo o ia toto i sona fanua, ae na maua ai ma lala matutua o le maluana e 867, o fatu maluana e 9,545 ma lau maluana o lo latou mamafa e 21 tesimale 4 kilokalama.
E le gata ina fai le faatoaga maluana a Taoa ae na ia umia foi se laau malosi ma ni ututau e faasa ona aumai i Samoa ma ose fana e ta’ua o le air pistol.
O faamaumauga a le faamasinoga o loo faailoa ai o se su’esu’ega a leoleo na alu i Satapuala i a Ianuari o le tausaga nei ae na maua ai e leoleo, o le fanua e le mamao ma le fale o le ua molia o loo ola lauusiusi ai le laau faasaina. E lei faafiti Taoa ina ua fesiligia e Malu o le Malo poo ai e ana le faatoaga maluana ae na tautino o ia na totoina. E toalua isi tagata na saisai ma ave e leoleo faatasi ma Taoa mo su’esu’ega ina ua maua le faatoaga o laau faasaina.
Peitai o lea ua ioe le ua molia o ia e ana laau faasaina ma le laau malosi faapea ma ututau ae o loo tete’e isi alii e toalua e iai so la sootaga i lea solitulafono. O loo taoto nei le tete’e a ia alii o le a valaau e leoleo molimau e lagolago ai o la moliaga e fesootai ma le faatoaga maluana. Ae mo Taoa o lona ioeina uma o solitulafono na tuua’ia ai ua faasala ai nei e le faamasinoga maualuga i le 4 tausaga ma masina e valu.
O Taoa ua faaipoipo e fai le toalua ma le fanau e toavalu. E maualalo le tulaga na oo iai lona olaga a’oa’oina e faapea na gata i le vasega tausaga valu poo le year eight. Na faailoa e Taoa i le ofisa faanofo vaavaaia o ia sa faigaluega i le konekarate o le Flecther, ae na faigaluega foi i le Esetete Tausi ma ia vaaia ai se tasi o fanua o iai se faatoaga a lea faalapotopotoga a le Malo. Ina ua uma mai ia galuega sa amata loa se faatoaga maluana i le tausaga e 2012.
O se faatoaga na faia ai loa ma lana pisinisi o le faatau o le laau faasaina. Na ia faailoa i le ofisa faanofo vaavaaia o se laau maluana 6 futu lona umi e mafai ona faatau i le $500 tala. O tupe na ia maua i le pisinisi na faaalu mo le atinaeina o lona aiga ma e iai le talitonuga o seleni na ia maua na faatau ai ma lana taavale. O le aafiaga o Taoa i le laau faasaina i totonu o lona nuu na faatulai ese ai ma Satapuala.
O lea ua mae’a lona faamasinoga ma ua agai atu nei e tuli le 4 tausaga e nofo sala ai ile falepuipui.
