O se tasi o alo talavou o le atunuu ia Hurbert Raeli Levave na uluai ulufale i totonu o le maea i Sini nei i le tauvaga o le MMA mo le fusuaga taufeaa i totonu o le pa. O le taaloga Lenei ua fiafia i ai le toatele ona e ese lona suifefiloi o auala e ono toilalo ai lau paga.
E faataga lau kiki, lolomi faapea foi le feoai o ou lima e faamuta ai taumafaiga a lau paga.
Ua avea lenei taaloga ma mausa o tagata maimoa i luga o Televise togitupe ona o le vevesi ma le masoa e pei lava o se fusuaga i luga o le alatele.
O le itu lenei e fiafia i ai tagata ma avea o se faafiafiaga i le maimoa.
O nisi o tama Samoa ua lauiloa i le lalolagi i le MMA e iai Ray Sefo, Mark Hunt, Jason Suttie ma nisi.
O Hurbert Raeli Levave e sefuluvalu tausaga ma o se alo o Lise Raeli le afafine o le alii fusu lauiloa i Niu Sila i tausaga ua mavae o Raeli Raeli.
Na lona tolu lana paga i faasologa o fusuaga i lea po. O lana paga o se alii Samoa ia Vili Tama ua loa i le taaloga mai le kalapu a Minto lea e faiaoga ai le susuga a Mark Hunt lea sa siamupini i le lalolagi.
E ui na faiaina Hurbert i lana uluai taaloga, ae na matua faafiafiaina le au tapuai faatasi ai ma lona tina ia Lise Raeli mai Papauta, lea sa avea ma uluai tamaitai fuimu (firefighter) i Samoa sosoo ai ma le avea ma tamaitai leoleo i Samoa i le 1995.
“Mea sili lava ua oo Hurbert i le tauvaga mo le taimi muamua ma ua iloa ai le tulaga e ao ona ausia mo le lumanai”, o le manatu foi lea a ona aiga ma ana uo na tumutumu ai i le Roxy i Parramatta.
Mai paga e sefulutolu i lea po, e toalima tamafanau a Samoa na tauva e aofia Hurbert, Manu Sione mai le kalapu a le KMA. Bryce Su‘a, Mose Afoa ma Vili Tama mai Minto.
E tolu taamilosaga tai tolu minute na faia ai le tauvaga. E $60 le tau o le pepa ulufale ma na faatumulia lea po.
O le alii o Hurbert e aupito laitiiti ai, ma o lana miti ia avea ma se tasi e iloga i le lumanai. Ia manuia tele au taumafaiga Hurbert!
