Tofia pule sili fou ole SIFA

Dr. Fanaafi Aiono-Le Tagaloa
Dr. Fanaafi Aiono-Le Tagaloa

Ua faamaonia ele Kapeneta le tofia ole Afioga Tootooleaava Dr. Fanaafi Aiono-Le Tagaloa e avea ma Pule Sili ole Pulega o Tupe Faavaomalo a Samoa mole tolu tausaga.

Na faasalalauina lenei avanoa mole silafia lautele e tusa ai ma aiaiga talafeagai, ma e iva tusi talosaga na faaoo ane.

Na faia le ioiloga, ma e toalima i latou na valaau mole faatalatalanoaina ole avanoa ele komiti faapitoa. Ile maea ai ole faatalatalanoaga male iloiloga, na tuuina mai ai le fautuaga ile laulau ale Kapeneta mole faia ole faaiuga.

Ole afioga ia Tootooleaava oloo umia Faailoga Maualuga ole PhD i Tulafono ma Faailoga Tikeri i Talafaasolopito mai le Iunivesite o Otago i Niu Sila, Faailoga Tikeri ile Gagana Samoa ile Iunivesite o Savavau, faapea ma isi Faailoga ma Tusi Pasi.

O ia foi ose loia faamauina o le Faamasinoga Maualuga a Samoa ma le Faamasinoga Maualuga a Niu Sila. Sa amata aoaoina i totonu o Samoa ma faaauau atu ai ana aoaoga i totonu o Niu Sila, lea na ia ausia ai nisi o tulaga maualuluga ile gasologa o lona soifua aoaoina. E tofia nei le Afioga ia Tootooleaava e avea ma Pule Sili ae oloo avea o ia ma faauluuluga ole Vaega o Tulafono ma Resitara, ma sa galue foi ile tulaga faakonesale ale Pulega o Tupe Faavaomalo a Samoa (SIFA) talu mai le amataga ole 2014.

Ole tausaga 2010 ile 2013 na avea ai o ia ma taiulu ile Ofisa Faafailautusi ale Samoa Law and Justice Sector, ma ole 2010 foi na faiaoga mole Iunivesite ole Amosa o Savavau. Sa galue foi o ia i tulaga faafaiaoga i totonu o le Iunivesite o Otago ma faapea foi ona galue i nisi o nusipepa.

Ole Afioga ia Tootooleaava e mai afioaga o Fasitoo-uta; Sili ma Gautavai; Salani; Sapapalii; Lotofaga; Taga; Lepea; Fogapoa; Saoluafata; Salesatele; Manunu; Afega; Malie; Faala-Palauli; Salelologa; Safotu; Falealupo; Fagatogo; Iliili; Manu‘a; Manono; Falelatai; Ulutogia; Lalomanu; Falefa; Lefaga; Vaimoso; Apia; Laulii; Fagalii; Amaile; Tuanai; Faleula; Mauga-tui-o-Faleata; Saleufi ma Alafua.

Ole isi ona suafa matai o Aiono Suamamataia mai Fasitoo Uta ma e tautua mo le Ekalesia Faapotopotoga Kerisiano Samoa i Fasitoo Uta.