Ole faaiuga ole tausaga na tuanai atu na faatoa amata faalaua’itele ai le anavatau ale Samoa Soofaatasi ale lalolagi ile aai o Melepone le faalapotopotoga ua faaigoaina ile gagana Peretania ole Samoa Solidarity International Group, ae ua fai si umi o faataamilo ana fuafuaga ma tau faamaoopoopo lea anavatau e i latou na mua i malae ma lagolagoina talu mai le amataina i Samoa.
Ile mae’a ai la ona soalaupule la latou savali mase tuualalo ile Fono faufautua mo tagata Samoa i Vitoria ina ia o latou galulue faatasi ma lagolago la latou mau talu mai le faaiuga o lena tausaga, o lea ua foliga mai ua amata vaaia ata o ta’ulelei ma vavala foi malama ose moemoe fou e ala ile lagolago ale lautele ole atunuu ile aai.
O nai vaiaso talu ai na faatalanoaina ai la latou mau i luga o leitio ma valaaulia faaaloalo ai le paia o Samoa mo la latou faatasiga muamua ma faamanino ai loa le anavatau ma la latou misiona, ole molimau ale komiti, ole agaga faamaulalo ma le faaaloalo ina ua vaaia le lagolago ale atunuu, aua sa taumate pe tua mani ale talosaga, e u ii so latou faatauvaa ae o lea ua ofaga potopoto Samoa ua malie o ua malie malo. Na autasi le finagalo ole atunuu i lea aso ole a totofi se laulau e foeina le sa, lea ua amata ona see ona tusiaao lea mo le faletua ia Lanutasi Piuila ua taitai, o lona sui ole faletua ia Maria Tuua, aao tusitusi le afioga ia Galumalemana Ronnie ma le teuoloa le susuga ia Seiuli Alefosio, na faee aao ole aufaigaluega totofi faatasi ma tupu ma tamalii ile sauniga puupuu ma faamanuia i lo latou alofaiva.
Ole Aso Sa la na tuanai atu nei na usuia ai la latou fonotaga muamua, ma faataoto ai fuafuaga faaalualu ale faalapotopotoga mo lenei tausaga ma le lumanai. O outou māmā na.
