Laauli Sir Michael Jones

Laauli Sir Michael Jones

Ua tofia nei e NZ Rugby Laauli Sir Michael Jones e avea ma sui o le Laulau a Fono a le NZR. O Laauli ua sui ia Glenn Wahlstrom ua faamavae.

E lē o le taimi muamua lenei ua tulai mai se Samoa i totonu o le Fono Aoao a le NZR. O Tuifaasisina Sir Bryan Williams na na filifilia foi i le Laulau a Fono a le NZR. Na avea foi Tuifaasisina ma Taitaifono a le Fono Aoao a le NZR mo le lua tausaga.

O le tofia ai o Laauli e sui ia Wahlstrom o se tulaga lelei lea mo le taaloga. Na ta’ua e le taitaifono Brent Impey, o Laauli o se tagata e amanaia e le toatele i totonu o Niu Sila. O Laauli o se tagata e faamaopoopo i mea lelei, e agavaa ma iai ona tomai i le faamaopoopoina o tagata, e le gata i lea, o se alii e tele lona tomai i le taaloga lakapi.

“Ua leva ona tautua Sir Michael i totonu o NZ e lē na’o se tagata taalo ae o se ta’ita’i. O le mafuaaga foi lea ua faaee ai ia te ia faaaloaloga a le Malo o NZ o le Knighthood,”O le saunoaga lea a le taitaifono Brent Impey.

“O ia tulaga uma, e faapale ai galuega a Sir Michael i totonu o NZ ua onomea lona auai i le Fono a le NZR aua le faaleleia o le taaloga mo le lumanai.”

O lenei tofiga e taua tele, aua e toatele alo o le Pasefika o loo tautuaina le lakapi i NZ. Peitai na o Tuifaasisina le tagata pasefika na saofai i le laulau a fono a le NZR, ua leva ona faamave Tuifaasisina, ae o le faatoa toe maua se isi sui mai le pasefika i totonu o le Laulau a Fono a le Lakapi a NZ

I le mea amiotonu e tatau ona 2 i le 3 sui o le Pasefika i totonu o le Fono. O le Laulau-a-Fono e toaiva sui tumau, sui ia e tofia ma palotaina, ae e tolu isi sui e filifilia e isi tino o le taaloga e iai le sui a tagata-whenua poo le sui o tagata Maori. E lua foi sui e tofia mai totonu o Iuni i Saute ma Matu o NZ.

I le Fono o loo iai nei, o Brent Impey o le taitaifono lea, ua atoa le lua tausaga o lana nofoaiga ua tatau ona suia lona tulaga i se taimi o le tausaga 2018. E na o le toatasi le tamaitai i totonu o le Fono, o le tamaitai lea o Farah Palmer sa kapetenia le ‘au a le Black Ferns.

O Laauli ua 53 tausaga o lona soifua. E 55 ana taaloga mo le All Blacks. E tai tutusa Laauli ma Tuifaasisina i le isi tulaga, o laua uma na avea ma faiaoga a le Manu Samoa, 1996-1999 ma le 2004 – 2007.

Na saunoa Laauli i le tofia o ia ma faailoa le agaga faafetai, “Ua ou lagona le agaga maualalo i le faaaloalo ua aumai ia te au e le NZR. Ua ou sauni foi e tautua le taaloga e auala atu i le Laulau a Fono.”

Sui o le Laulau a Fono a le NZR

Brent Impey (Taitaifono), Richard Dellabarca, Andrew Golightly, Peter Kean, Stewart Mitchell, Steve Morris, Dr. Farah Palmer, Mark Robinson, Laauli Sir Michael Jones.

Comments

comments