Tofia Galumalemana Fata i le Laulau a le Fono

O le aso 13 o Tesema 2014 le seminar faaiu o le tausaga e faatautaia lea e le fono Aoao a tagata Samoa i Sini ma faauma ai ana galuega fai ae alo atu i le kerisimasi ma le tausaga fou.

O lea Semina o le a saunoa ai se sui mai le Ofisa o leoleo e lapatai atili vaega o le tulafono e ao pea ona nofouta i ai tagata Samoa uma i Sini mo le puipuiga.

O le taimi muamua foi lea o le a auai ai le afioga ia Galumalemana Fata Ropati Masini i lona tofiga fou o le Sui Peresetene. O le taimi nei o Muagututia Vailolo Siutu sa umia lenei tofiga ua seei i le nofoa o le Taitaifono i le faamavae ai o lē sa avea muamua ma Taitaifono ia Teleiai Sonny Wilson.
O le aso lava foi lea o le a faia ai ma se fiafia tele a le Fono Aoao a Tagata Samoa i Sini e molimoli ai sa latou fafetai tele i le mamalu o le atunuu i ona tupu ma e‘e aemiase kamupani sa lagolagoina a latou faamoemoe i le 2014.

O le 2014 o se tausaga maoa‘e i galuega a le fono i le faataunuuina ai o le Tuufaatasi o Samoa i le Sisigafu‘a aemaise ana galuega fesoasoani e pei o le taligamalo i le Toa Samoa, malaga mai a faletua o le HRPP le Tausala Samoa, Le faigamalaga a le vaa o le Gaualofa aemaise semina mo le faasoaina o le malamalama i matagaluega eseese e sulufai ai le atunuu mo fesoasoani.

E lē gata foi i lea o le galulue faatasi ma le vaega o leoleoga i le po i pitonuu i Sisifo o Sini e aofia ai Blacktown, St Mary’s ma Mt Druitt. I le fonotaga i le Aso Sa na tofia ai Galumalemana Fata Ropati Masini e avea ma sui peresetene, na faailoa ai foi e le laulau ana fuafuaga mo le tausaga fou auā tapenaga mo le Tutoatasi 2015 lea e faia ai foi nai sailiga seleni e pei o le taamilosaga tagapolo, tausala, seniors idol aemaise le Bingo lea e fiafia i ai tamā ma tina matutua.

O loo tumau pea isi tofiga e pei o le Failautusi ia Feagai Kirisome, Public Officer o Leilua Jerry Uesele, Teutupe ia Faumuina Lisa Parker, ma le sui teutupe ia Vaele Ilalio faapea le susuga i Rev. Iakopo Leleimalefaga.
Afioga Galumalemana Fata Ropati Masini ma le faletua ia Matalima ma lo la alo ia Josephine