E toasefulu ma le toatolu tamaiti aoga o le Aoga Amata a le Aiga Salevalasi ua faatofa ma faamavae e lē toe foi ane i ai i le tausaga fou, ona ua mae‘a lo latou taimi faatulagaina mo lea foi vaega o le olaga a‘oa‘oina.
O tamaiti sa faauu ina ua atoa le tai lima tausaga, ma ua sauni nei e ulufale mo aoga maualalo poo le tausaga muamua i le faagasologa o le olaga a‘oa‘oina.
Sa faatumulia mātua ma aiga e molimauina ma faaalia foi le agaga faafetai ma le lagolago i le faamoemoe o alo ma fanau i lo latou aso ma taimi mulimuli i le aoga.
O le susuga i le faafeagaiga ia Paulo Ieriko, o ia foi o le pule sili (Licensee) o le aoga amata sa ta‘ita‘i i le sauniga o le faauuga.
O ia foi na saunoa e faalauiloa le lipoti ma le tala faaletausaga a le aoga mo le mamalu o mātua ma aiga.
O tamaiti sa faauu e aofia ai le alii o Danny Liuliu Afoa, Ferila Utumapu, Ziara Hope Amete, Faalu Shalom Tuvao, Chrisllaine Luamanu, Josmiracle Suaniu, Danny-Elle Fesolai, Hosea Mene, Patrick Peresa Mailo, Brian Ah Fook, Jeremiah Lia Misa, Devonte Laifa Tamalii, Miracle Angel Pule.
O le mae‘a o le sauniga faapitoa mo le aufaauu, ona alo ai loa lea o le fanau i pesepesega mo le Kerisimasi, ae taualuga i faafiafiaga o tala ma siva faa-Samoa sa saunia e vaega e lua o le fanau sa vaevaeina i ai le aoga.
O faafiafiaga ma siva sa a‘oa‘oina lava mo le manuia o le fanauiti, ae sa faatino ai foi ma le titifaitama o mātua e ala i tausala a aiga.
O seleni sa lafoina ma meaalofa sa taulimaina uma e le aoga, ma ua faamoemoe o le a agai i ai nisi fuafuaga ma polokalame mo le lumanai o le aoga a le Aiga Salevalasi.
O le lipoti a le pule aoga sa ta‘ua ai foi le tulaga manuia ma le solosolo lelei o le aoga ma ana polokalame, ma ua faailoa ai foi le iai pea o avanoa mo nisi o tamaiti mo le tausaga fou e fia ulufale ane mo a‘oa‘oga.
