Toese fia fai aiga

 Le alii o Toese o Falealupo ma Faleapuna ua fai le taulaga ma ona toomaga i aso uma
Le alii o Toese o Falealupo ma Faleapuna ua fai le taulaga ma ona toomaga i aso uma

Ole tala muamua lava a Toese ina ua fesiligia ele tusitala poo le ā se mea e sili ona manao iai, “ou te fia nofo ise fale ma fai ai lava lo‘u aiga.”

Ua tele masina ma aso ua silia ile tausaga o vaaia pea le tino o Toese o nofonofo ile va ole fale o Polo male fale ole Ofisa mo Taui o Faalavelave Faafuasei ile taulaga o Apia.  O foliga vaaia o lea alii, e faigata ona taumate pe ose tagata ua leai sona aiga, pe ose turisi.

E amo lana ato faafafa, laei mamā, o lona pulou masani e pei ona vaaia ile ata ma tamaiti misionare mai le YWAM. A uma ona nofonofo ile polotito ole fale o Taui mo Faalavelave Faafuasei, ona alu ane lea ua nofonofo ile polotito ole fale ole Gold Star oloo faafesagai.

Sa faigata ona iloa tonu pe mafai ona talanoa Toese ise tagata, auā ole tele o taimi e vaaia lava e na ole nofonofo lava ma maitau foliga o lea aso ma lea aso.

Peitai ina ua talanoa mai lea tamalii, ma sasaa mai ai lana ia ato ponapona o nofonofo ma ia ile taulaga.

“O a‘u ua fia maua lava so‘u fale oute nofo ai ma fai mea oute manao ai. Ua leva foi ona ou fia faigaluega e maua ai se tupe e fai ai lava mea oute manao ai.

Ole susuga a Toese ole tasi ole fanau e 12 a ona mātua. Ua maliu lona tina ae oloo soifua mai pea lona tama ia Aeau. Ole molimau a Toese ua lē mafai ona nofo i sona aiga talu ai, e lē o mananao lona aiga latou te nonofo.

Ole faamatalaga foi lea a lona tuafafine ia Elena, lea oloo vaaia nei lo latou tamā i Vaimoso. “O lo‘u tuagane lena e masani ona sau e taele i Vaimoso, ae o isi aso e alu ai i Togafuafua ia Lesina.

O uo a Toese mai le aoga faamisionare ale YWAM i Falealauniu uta, oni tamaiti aoga mai le malo tupu o Toga
O uo a Toese mai le aoga faamisionare ale YWAM i Falealauniu uta, oni tamaiti aoga mai le malo tupu o Toga

Ole tala a Elena, ole tama ua leva nai Niu Sila, silia male 20 tausaga, na faafoi mai Niu Sila ua leaga manu‘anu‘a ona lima faapea na afaina i taifau.

Ai ua nofo ma faaleaga se fale tele na nofo ai, e foi mai i Samoa o soifua lava le matou tina, lea ua silia male sefulu tausaga talu ona maliu.

Ile saunoaga a lona tamā ia Aeau, “ole olaga lenei ole olaga saoloto, lena ua tuu lava ia e fai lona saolotoga.”

Na ia ta‘ua foi ua 86 a‘i lenei o tausaga o lona soifua, ma oloo sologa lelei lava le latou mafutaga ma lana fanau teine o vaaia nei ia. E faamatala lava le toeina ma soisoi i lona malosi ma lona soifua maloloina o iai nei.

Peitai ole molimau a Elena, sa latou nonofo foi ma lona tuagane, peitai e iai ona uiga ua fefefe iai latou, “ona e te‘i lava ua oso ane tago ise naifi, ma tuua‘i se tama o latalata ane iai faapea na tago kiki ia.”

Na faaviivii e Elena uiga lelei o lona tuagane, “ose tagata e faifeau lelei, a oo foi ina kuka e fai meaai lelei male mamā. Peitai e iai isi uiga faigata ole alii e faaali i lona aiga ua fai lava ma faafiufiu i ona tauaiga, pei ona faamala ef Elena:

“A fai se matou meaai, fasipovi, ae tago tia‘i i fafo fai mai e ave e ‘ai ma maile, fai mai oloo alaga tagata. Toetiti lava maliu ai le toalua o lo‘u uso. Na afua mai ina ua sau ki le TV ile Aso Sa, ae fai atu iai le toalua o lo‘u uso, ae leiloa e sesi o iai sana tamai naifi i lana ato. Na afaina ai le toalua osi o’u uso.”

“Sa nofo foi i le matou uso i Togafuafua ma isi matou aiga.

E oo lava ile aiga ole matou tina. O isi taimi e nofonofo lava ita fesili poo ai o talanoa ma talie atu ia te ia. E fai lava ma sau e taele ma fai ana tagamea ma ‘ai ona toe alu ai foi lea.”

Ile taimi nei, ile faamatalaga a Toese, a oo ile afiafi ona alu lea e vaai le poloka a lesi aiga ile maketi. E moe ai ile poloka lea ma leoleo oloa ale aiga lea e masani ai.

E maua mai ai lana $10, ona faaalu lea o lena tupe i lana meaai ole aso, seia oo foi i lesi aso. O isi taimi e taumafai lava e faaola lona mafaufau ma alu ai ile faletusi e suesue ai ma faitautusi.

Peitai e lē o tuua ai lona manaoga o aso uma, ole fia fai aiga, e alu iai ma nofo ai, ma fai ai mea e manao ai. Sa masani ona faigaluega konekarate, ae ua lē toe maua lena avanoa ile taimi nei.

Ua maitauina le telē lava ose eseesega o Toese ma isi tagata oloo nofonofo ile taulaga. O Toese ele ‘aisi ise tagata ise tupe, e na ole nofonofo lava ma matamata.

Peitai i totonu ole ‘afa itula na talanoa ai male Tusitala, e silia ile $20tala le tupe na foai iai e tagata savavali.  Ae ui ile tele o ia tupe e maua ile aso, “ae oute fia nofo lava ise fale ma so‘u lava aiga.”