Toe vaaia i Samoa masini pue ai saoasaoa o taavale

O le vasega o leoleo taavaleafi i Samoa na latou uluai faaaogā masini e pue ai le saoasaoa o taavaleafi lea e iloa ai le taavale ua sili lona saoasaoa ma le saoasaoa faatulafonoina e tatau ona alu ai.

Ua leva ni tausaga e lē o toe iai ni masini faapea le mafuaaga ua iai le talitonuga ua tele ai faalavelave i luga o auala e mafua i le soona alu saoasaoa ma le lē mafaufau o nisi taavale. Ua avea foi le lē toe iai o ia masini ua fai ai lava le saolotoga o nisi avetaavale i le soona alu saoasaoa ma lamatia ai le saogalemu o tagata savavali ma tagata e malaga i taavale.

O lea la ua toe aumai e le Pulega o felaua‘iga i luga o le laueleele ia ituaiga o masini ae ua iai ma le masini sili ona mamao lana pue o se saoasaoa o se taavale le laser.

Fai mai le alii pule o le vaega o taavaleafi a le LTA (Land Transport Authority) le afioga Muagututia Tominiko, o le alafua lea ma le taiala ua manatu le pulega o le a laasia mo le tausisia ai e ave taavale o le saoasaoa faatulafonoina.  E le ogaoga lava se faalavelave tau taavale pe a lemu le alu a le taavale, ae a saoasaoa e lē tau faailoaina atu le tulaga e oo i ai”. “E ui ina taugata nei masini ae ua taumafai e aumai ona e maualuga le manulauti a le Komiti Faafoe ma le pulega o le saogalemu o le atunuu e tatau ona ave i ai le faamuamua”.

Faaalia e Muagututia e lua ituaiga o masini o le ituaiga o le rador e pei o masini sa faaaogā muamua e leoleo, ma le masini fou o le laser e iai lona scope poo lona meavāai e fetaui ma auala fou ua iai nei i Samoa e fā lanes.

O le masini fou foi lea e mafai ona ia pueina le saoasaoa o se taavale i se mamao e tusa ma le tasi le afe kilomita. O lona uiga afai o le mamao lea o loo iai se taavale o loo saoasaoa tele e mafai e le laser ona ia pue ma faamau le saoasaoa ma e lē toe maua ai se pepelo o se ave taavale.

O se alii leoleo asiasi poo se police inspector ua litaea mai Niu Sila o loo feagai ma le aoaoina o alii ofisa o le LTA ina ia maua ai lo latou silafia e faaaogā ai masini. Fai mai le alii faiaoga o Ron Phillips mai Niu Sila, e tāua tele le iai o nei masini i Samoa auā o le a mafai ona faaitiitia ai faalavelave tau taavale e mafua mai i le soona alu saoasaoa.

O le masina fou lenei o Fepuari 2016 ua amata ai ona faaaogā nei ituaiga o masini, ma e fā masini o le a faaaogā i Upolu ae lua mo auala i Savaii. O le tau atoa o nei masini na faatau mai ai e le LTA i Samoa e silia i le fāsefulu afe tala, ae a tuu loa iai ma le totogi o le tiute ma felaua‘iga ua lata lava i le lima sefulu afe poo le sili atu foi.

O loo faataitai pea le faaaogāina o nei masini e alii ofisa, ae o le talitonuga e oo atu ia Mati i le taimi o le faigapalota tele a le atunuu ua amata ona molia avetaavale e maua e nei masini ua soona malaga saoasaoa a latou taavale.