O le faaiuga o le vaiaso lenei o le a talimalo ai le Kalapu a le Malisi i Samoa i aulakapi taitoafitu e 24 mai itu eseese o le Pasefika i le tamilosaga taitoafitu faavaomalo lea e faia i tausaga taitasi. O se taligamalo tele ua lagolagoina e le Vailima i Samoa ma nisi o kamupani eseese ua faamautu mai i lenei vaiaso lo latou sao e talimalo ai i kalapu o le a tausinio i lenei taamilosaga o le 2011.
“Ua taumafai lava ina ia maualuga le tulaga o taamilosaga faavaomalo e pei ona masani ai i tausaga taitasi o le Malisi Faavaomalo,” o se faamatalaga lea a le Komiti o loo nafa nei ma le tapenaga o le faaiuga o lenei vaiaso.
E aofia i ‘au ia e 24 kalapu i Samoa nei, Rarotoga, Toga, Ausetalia, Fiti ma Niu Sila. Faaalia e le Komiti a le Malisi – o Amerika Samoa i lana Malisi na faamoemoe e auai mai peitai o loo sauni le ‘au i le taamilosaga a le Pasefika o le taito‘a 15 lea la ua lē mafai ai ona agai mai i Samoa mo lenei faamoemoe.
Sa iai foi le faamoemoe e agai mai le ‘au mai i Tokelau, lea e lei leva ona mae‘a sana malaga taamilo mai i Samoa mo le Taitoafitu a le atunuu na faagasolo, peitai ua lē mafai ona o i latou ia o loo fesoasoani malosi i le tau faasoasoa lea o le suavai i motu e fa o le Atu Tokelau. E ese mai i ‘au nei o loo iai le manatu e taunuu uma mai i le vaiaso lenei kalapu ia ua faamautu mai a latou ‘au e auai mo lenei faamoemoe i Samoa.
O se vaega lenei ua faaauau ai taamilosaga o le taitoa fitu lea e faagasolo i Samoa ae e pei lava ona silafia o le Taamilosaga muamua lava lea faavaomalo na faatautaia i le Lakapi Taitoafitu ma e ui lava la o se vaega o le taamilosaga tele a le atunuu ae ua ese lava le maualuga ua faatautaia ai lenei taumafaiga talu ai o le taimi tonu lenei e auai mai ai loa ma ‘au mai i atunuu mamao.
O se avanoa tāua tele foi lenei i sauniuniga a le Taitoafitu a Samoa auā le taamilosaga tele o le Lakapi Taitoafitu a le Lalolagi poo le IRB.
O se taimi tāua lenei i sauniga a le ‘au a le atunuu e filifili mai i taamilosaga nei o loo faagasolo ma e pei ona ta‘ua e le Komiti ua faatautaia lenei faamoemoe, ua talafeauga lelei lava le unai lenei ma le mae‘a mai o le Ipu o le lalolagi i le lakapi ta‘i to‘a 15.
O le toatele lava o le au taitoafitu a Samoa ua faapea ona tofia mai i tama taaalo i kalapu i Samoa nei, ma o le faamoemoega foi o le atunuu e pei ona mae‘a saunoa i ai le Alii Palemia, le Taitaifono o le Iuni Lakapi a Samoa, afai ua lē manuia mai taumafaiga i le Ipu o le Lalolagi i Niu Sila, e tatau ona toe sagai ane le Iuni e unai ma faamalosia le lagolago i le taitoafitu a le atunuu lea ua mae‘a faamautu le avea ma Siamupini o le Lalolagi i lea vaega o le Lakapi.
