Ua faalauiloa e sui o le afioaga o Vailoa se atinae tele ua tutu faatasi ai nei ma le lala o atinae a Malo Aufaatasi, le UNDP i le faatinoga. O le faatinoga lea o se galuega auā le toe totō o le togatogo o Vailoa i Faleata.
O se galuega na amata fuafua mai i le tausaga e 2009 ae o le fesoasoani tau tupe e silia i le $100,000 (tala Amerika) mai i Malo Aufaatasi lea ua agai ai nei le nuu e toe faamamā lenei nofoaga ma o le faaiuga o le vaiaso na potopoto ai sui o le afioaga sa faapea ona tapa lenei fesoasoani ma aoga ua avatu le lagolago i le totoina o le togatogo lenei auā le faatinoga o lenei galuega tele. Ua iai ma se taiala ua lomia auā le agai o le nuu e faaauau ona faamamā ma faaleleia lenei vaega tāua o le afioaga.
Faaalia e sui o le nuu o le tele o tausaga a o avea lea nofoaga e lafoai i ai le otaota a le tele o afioaga o le talafatai o le taulaga, o lea na matuā aafia ai lava le ogasami lea o le gataifale o le nuu ma faapea ai ona mamate meaola o le togatogo.
Ua see atu nei le lapisi a le malo i Tafaigata ae e lei iloga lava ona toe foi le lelei o le togatogo i le tulaga sa iai i i‘a ma figota na tausi ai le nuu. E ui o lea, o le taumafaiga lenei ua iai le manatu o le a matuā fesoasoani i le toe faafoi o le maloloina o nei laau ma le mamā e tatau ona iai.
Faaalia e sui o le afioaga, le tāua tele o lenei atinae lea ua faapea ona toe agai le nuu e faaleleia ma o le fesoasoani mai i aoga o le talafatai o le taulaga e pei o le Kolisi o Ropati Lui Sitivenisone, o le Kolisi a le Faatuatua ma le Kolisi a Faleata, o nisi ia o aoga ua ofo mai le taimi o fanau e unai le faamamāina o lenei nofoaga ma le toe totoina.
Ua manino foi le afioaga o nisi o nuu i totonu o Samoa na faapea ona faamoemoe i togatogo nei auā faamalumaluga i taimi o afa fulifao na molimauina nei i le atunuu auā o le tasi lava lea tulaga tāua o togatogo o le tali muamua lava lea o matagi malolosi atoa ai ma le siisii o le sami a o lei aafia le pa‘u mātū ma o se tasi lea o vaega tāua na laga e le nuu i le taumafai ai e toe faamalosia togatogo o lenei vaega o le talafatai o le taulaga.
Sa tulai mai le fesiligia o le galuega e se isi itu o le nuu aemaise o nisi o taitai o le afioaga ua faapea mai, e ui o le faatāua lava o le polokalame o le faaleleia o le togatogo ae o loo iai vaega o le nuu lenei sa lē tatau ona lotea i le polokalame ma sa tatau ona manino i ai aoga ma le UNDP i le pulea ma i latou sa tatau ona agai i ai i le faatinoga o le atinae.
O le vaiaso lenei e toe saofafai ai isi sui ia o le afioaga ma le UNDP e faamanino lelei le faagasologa o lenei galuega. O loo malilie uma itu e lua o lenei galuega e tāua mo le faaleleia o le gataifale ma le tausiga o sui o le afioaga, ma o iina lea o le a faaauau ai talanoaga o lenei vaiaso ae mo le fanau aoga, o le faatāua ua ave i le toe totō o nei togatogo ma le faamamāina e pei ona ofo
mai ai le latou foi fesoasoani.
