Ole atoa ole vaiaso talu ona faamavae le sui faipule o Gagaifomauga Numera Muamua ma le tofi Minisita ole Kapeneta, na tali ai talosaga ale Palemia ise isi faipule o lana itu faaupufai ole HRPP e avea ma minisita fou o lea matagaluega, ma toe atoa ai minisita e 12 o lana kapeneta.
Ole taeao ole Aso Tofi le aso mulimuli ole masina o Aokuso (31 August 2017) na faasilasila ai loa le sui faipule ua faailoa ane ele Atua ile Palemia e avea ma minisita le tofa Lopaoo Natanielu Mua, ole faipule ole itumalo o Vaisigano numela tasi lea e aofia ai afioaga o Asau, Vaisala ma Auala i Savaii.
E lei faasilasilaina ele Palemia le minisita fou ao tatali le au valaaulia na auai atu ile faatautoga ole Minisita, ae o fafo ole maota fono o Tui Atua Tupua Tamasese Efi, oloo malomaloa ai finagalo o nisi o faipule ole HRPP e oo lava i Minisita lagolago, poo ai ole a tofia e lo latou taitai.
Na faaataata a lafoga nisi o finagalo faaalia ma fai mai e le iloa pe tofi mai nei ose faipule tutoatasi. Ose isi manatu na lagona i suaga a faipule ole HRPP e le iloa pe toe fetuunai uma minisita ole Kapeneta ma matagaluega oloo galulue ai.
Peitai ina ua faailoa le filifiliga ale Palemia na sa ole maota e lei toe vaaia se migoi ma se musumusu o faipule ile isi ina ua sese uma a latou matematega. E oo lava ile sui faipule o Vaisigano numela tasi ua tofia na matua faateia i lona valaauina ile tofi minisita.
Na saunoa Lopaoo Natanielu ma ia iloa ai lea tulaga ona na ia saunoa ua na lē iloa se tala a saunoa ai ona ua oso a’e lona te’i ua tu ile me’i e pei o lea muāgagana. Ile saunoaga a Palemia susuga Tuilaepa L Sailele Malielegaoi, na ia faaalia sa taumafai e faapaleni minisita o lana kapeneta ona ole tasi o faipule mai Savaii lea sa umia le tofiga ma ua manatu ai e toe tofi se isi faipule mai Puleono i Salafai.
O Lopaoo o lana paeaiga muamua lenei ile tofi faipule o lona itumalo ile Palemene, ma ole tausaga ua mavae na tofia ai ele Palemia e nate taitai faipule ole HRPP ua avea ma itu e agaia le faigamalo a lana vaega faaupufai. Sa filifilia foi ele Palemia e avea ma taitaifono ole Komisi suesue ale Palemene na suesueina tuuaiga faasaga ile faatinoga o tiute ole Faamasinoga o Fanua ma Suafa.
Ole saunoaga lenei ale Palemia ile filifiliga ma le faatautoina ole Minisita fou o lana kapeneta.
Oute muai taia le tū tafaitoa ma ou vaisausauina paia ua sasao nei, paia faale Ekalesia, faalemalo, faaleatunuu. O outou sa ma faigata, taalolo.
Oute tulai atu ma le ava tele e faailo ile agaga fiafia lē ua filifilia e nate tauave faaauau le tofiga ole Minisita o Faatoaga ua faagafua nei ona ole faamavaega ale Afioga ia Laauli Leuatea Polataivao, na tauaveina tiute ole tofi Minisita o Faatoaga.
Ile filifilia ose tasi na te faaauauina lenei tofiga tāua tele ile atinae o Samoa, e le ose filifiliga e faigata ona e taufai agavaa uma faipule ole vaega lenei faaupufai ole HRPP. E taufai agaga uma foi e ofo mai o latou tagata e tautua le Malo ma galulue ai faataulelea e atiae lo tatou atunuu.
E lē na ona nofonofo ma faalue ile ofisa ua faaea malulu, ae tutulai ma savali e vaai tino galuega e tatau ona fai.
E 47 sui o Itumalo mai le 50 nofoa ole Palemene oloo iinei ile HRPP. I lea 47, e 20 faipule o Salafai. Ile Kapeneta e 12 Minisita o iai nei, e toalima e mai Salafai e lē faitauina ai le Palemia ae toafitu Minisita o Tumuā nei.
E leai se tulafono o iai e faatonutonu tatau ai le aofai o Minisita ole Kapeneta mai Salafai. Ae fia foi Tumuā. E fia tautua uma foi sui ole HRPP e ala ile tofi Minisita. Ae ole faautautaga tatau ina ia faatumau ai le maopoopoga mamalu a lo tatou Malo e afua ai ona taufaataoto se alafua e tau faapaleni ai mea nei o tofiga mamalu a lo tatou Malo. E ao ai ona toe suia ele Savaii le Savaii.
Ua ou fiafia ai e faasilasila atu le tofia o Lopaoo Natanielu Mua mai le Itumalo Vaisigano Numera 1, ole Itu Agai ale HRPP, e avea ma Minisita fou ole Matagaluega o Faatoaga ma Faigafaiva.
Momoli la’u faafetai ia Laauli i lona tauaveina ole tofiga ole Minisita o Faatoaga i lenei tausaga ma le lima masina ole paeaiga oloo faagasolo nei.
Lau Afioga ile Minisita ole a faatauto nei oe, o lau tautinoga lava lea i luma ole Atua. Ole a e faatino ai ou tiute faa-Minisita ile faamaoni atoatoa. Ole a le uiga o ia upu? E lē toe iai se mataupu tau oe ma ou aiga, e faaluafesasi i lou valaauina.
O lou taimi atoa, ole a tuu atu ete faatino ai i mea aupito silisili galuega ina ia faamalie ai ile atoatoa manaoga o tagata uma o lo tatou atunuu e sulufai atu ia te oe mo se fesoasoani.
E te lē toe avanoa foi e toe fai ni au pisinisi tau oe lava ia. Afai e iai se faamoemoe faapena, lafo i isi o lou aiga latou te faia ete lē toe aafia ai – ona o lau tautoga.
Ne’i e manatu e mafai lava ona fai ise tulaga foi lele faalilolilo, e leai se mea e lilo i Samoa. Ma o ni faiga lē tonu foi e fai ile posiga, e matuā manino ile silafaga lilo ale Atua, pei ole malama ole mutinitini ole la. Na fai ele tupu o Tavita nisi uiga faapena ile posiga ma ole sala ale tupu, ole masofa malepelepe ole faaauau pea ole nofoaiga a lona aigatupu, ma vaelua ai ma lona Malo o Isaraelu.
O a matou toe upu, ia manuia lou tofi. Ia sagai ane ‘ai ole tai. Ia faaosofia moegaluaga ma ia utupūpūina fulu ole segaula, maua le tōfā e faatino ai ou tiute. O ou māmā na.
Soi fua.
