“Toe timata le upega”

O le ulutala i luga na fai ma mataupu autū o le faafouina o faiaoga Aoga Amata i le Iunivesete Faatekonolosi a Aukilani i le Aso Toonai na tea nei. Na faatumulia le potu aoga o le Iunivesete i Aukilani (AUT) i le toatele o faiaoga Aoga Amata na auai e faafofoga i le mataupu.
Sa faaalia le fiafia o faiaoga i galuega faatino aemaise foi o le folasia atu ia i latou le tāua o le iloa e le tagata o ia lava ma lona faasinomaga. E faapena foi le faasoa i le itu i le Toe Timataga o le Upega (Self Review) mo le silafia lautele o faiaoga Aoga Amata i lenei foi tulaga mo le faaleleia o a latou galuega i le lumanai.
O nei mataupu sa faasoa i ai ma taitaia e ni faiaoga mai le laumua i Ueligitone le Tofa ia Tulimalefasi Tanielu-Dick ma Le‘autuli‘ilagi Taotua Sauvao, o sui o le Komiti Faafoe Aoao o le SAASIA.
E tofu lava le tagata ma lana pito na faasoa i ai e uiga i le sini autū o i luga. Na amata le faasoa ia Le‘autuli‘ilagi Sauvao i lona aumaia lea o ni vaega e tolu na ia faatāuaina i le Faasinomaga. O galuega faatino foi mo faiaoga e uiga i le aganuu sa faapea foi ona faaaogā ai faiaoga na auai e faataitai mo lo latou faatinoina lea i totonu o Aoga Amata.
Na faapena foi ona sosoo ai ma le Tofa ia Tulimalefasi Tanielu-Dick i le faaopoopoga i le aganuu ma le Faasinomaga atoa ma lona faasoa atu i le toe Timataga o le Upega (Self Review).
O le fesootaiga o le aganuu, faasinomaga ma le toe timataga o le upega na faasoa mulimuli i ai Le‘autuli‘ilagi Sauvao ma faamae‘a ai le faasoa mo lea aso.
Na fono ai foi ma le Komiti Aoao i le Aso Faraile 2/8/13 mo la latou fono faapisinisi mulimuli o le latou auaunaga i le SAASIA. Sa faapea foi ona faamautu ai ma tapenaga mo le fonotele a le faalapotopotoga lea o le a faataunuuina i le masina o Oketopa.