Toe tepa i le olaga talavou o Tina

Tina Pasefika sa auai i le faatāuaina o tina e le Manukau Pacific Island Trust
Tina Pasefika sa auai i le faatāuaina o tina e le Manukau Pacific Island Trust

E leai se isi vailaau sili ona tāua nai lo le maua e le tagata o le loto fiafia ma le ola saoloto, ua galo uma ai le tele o le mau faafitauli aemaise ai le faigata o le soifuaga. E oo foi i ma‘i o le tino ma le soifua matua e oo i ai le olaga o le tagata e pei lava ua toe fafagu mai le taimi talavou pe a oo ina fiafia le loto.

O le maualuga lea ma le matagofie sa oo i ai le aso fiafia o tina sa faailogaina e le Manukau Pacific Island Trust i le taeao o le Aso Tofi, 5 o Aperila i le East Tamaki Hall i Otara lea sa militino faatasi ai tina uma Pasefika e lavea ai Tonga, Niue, Atu Kuki ma Samoa.

O se feiloaiga fiafia i tina uma auā ua maua lea avanoa e feiloai ai ma fiafia faatasi ma toe faamanatu ai le siva tenetene a o talavou le olaga. E ui i le eseese o gagana ma atunuu ae ua lē toe iai se Iutaia poo se Eleni auā ua tino e tasi tagata uma mo le faatāuaina o le Aso o Tina.

Maitauina le soifua matutua o tina i le 60 agai i luga sa auai faapea foi i tina laiti aemaise ai le lagolago a nai tamā auā le faamatagofieina ma le maualuga o le faamoemoe.

O pesepesega ma faafiafiaga na saunia e nisi o tina ma tamā mai Tonga sa fai lea ma avefeau mo le faatāuaina o tina, ae sili ai le siufofoga mālie o le alii o Elevisi Samoa lea sa tau vaovao mai ai loomatutua i le fia pai atu i lona aao a o faaali ana faafiafiaga.

Ae lē gata i lea o musika suifefiloi a Galumalemana Tenari Tautua sa matuā iloga ona toe vaaia ai le lelei o le kepu o aao o loomatutua. Na ese foi lagona o lea aso ina ua vaaia le fiafia o nai tina matutua sa auai ma ua maitauina ai e leai se isi vailaau sili ona tāua nai lo le maua e le tagata o le loto fiafia.

Sa faapea foi ona tufatufaina ni meaalofa mo tina matutua sa auai e talimasineia ai lo latou lagolago i le polokalame ua faapitoa mo latou.

O le susuga ia Laifai Toetu Iose o le CEO o le Manukau Pacific Island Trust sa fai ma fofoga o le aso.

E tele ni polokalame o loo faatinoina e le Manukau Pacific Island Trust ae o le tausaga lenei ua tapenaina ai se polokalame faapitoa mo tina e faatāua ai tina uma o le Pasefika, ma o le taimi muamua lenei ua fuafua ai lenei faamoemoe mo tina.

Sa tauluga mea uma i le taumafataga tele na tapenaina e le faleaiga o le Parataiso ma tatala ai loa tina e o e vaai tamā auā o le tele o tina sa tuu tamā i le fale e vaai tamaiti ma le faalavelave.