O le faatalaleleiina o agaga o le paia ma le mamalu o le atunuu, o tiute tauave ma le matafaioi a le aufaigaluega paia. Ae o le a‘otauina ma le faaauupegaina o le aufaigaluega, o kolisi faafaifeau e faataunuu ai.
O le itu matagofie ua faamanuiaina ai nei le aai o Melepone Ausetalia, ona o nai masina na tea atu na tatala ai le uluai lala o le kolisi faafaifeau a le Agape i le pitonuu o Melton i le itu i Matu o le aai.
Peitai o le afiafi o le Aso Sa na mavae atu, na toe tatala ma faapaiaina ai se tasi lala fou o le kolisi i le pitonuu o Dandenong, o loo i le itu i Saute o le aai.
O le faauluuluga aoao o kolisi nei o le susuga i le faafeagaiga taulagi ia Dr Peniamina Williams, na taitaia le sauniga ma sausaunoa i le upu autū o le aso mai le afioga paia a le Atua, ma ia tauaaoina atu ai le Tusipasi faamaonia o le amataina o le kolisi, i le susuga i le faafeagaiga taulagi ia Titi Magele, lea ua faauluulu i ai le lala fou.
O le susuga ia Titi ma le faletua ia Latafale o loo tausinuu i le Mercy Samoa Ministry Church i Dandenong. O le tatalo amata o le sauniga na fofogaina e le faafeagaiga ia Maiava Tulia le faauluuluga o le lala i Melton, ma sosoo ai ma faafiafiaga faaleagaga a la latou lala o le kolisi, na taitaia e le susuga i le alii faiaoga ia Namulauulu Taumatamu Samu.
O se tasi o tulaga na saunoa i ai le susuga ia Peniamina ma le agaga faagaeetia, o le lala fou lenei i Dandenong, o le a amataina a latou aoga i le malumalu o le EFKS a Dandenong, le Ekalesia a le susuga i le Faifeau toeaina o le matagaluega a Melepone i Saute le susuga ia Viliamu Finau. O aso o le a amataina ai le aoga, o afiafi o Aso Gafua ma Aso Lua faapea ma Aso Tofi o vaiaso taitasi.
Na faatumulia le afiafi e lē gata o Ekalesia eseese, ae o le paia ma le mamalu o le atunuu na molimauina ma patipatia le faamoemoe, faapea foi aiga ma nisi o tautua tau leitio. Na mae‘a le sauniga sosoo ai ma le taumafataga māmā, ona sunoa lea o le susuga ia Afuie Alefosio Afuie e fai ma sui o Samoa e faafetaia le Ekalesia ma le faauluuluga o le kolisi, ona tali fuaitau lea o le susuga ia Peniamina ma faamanuia ai mo le atunuu a o lei taape ma le fiafia ma le faamanū.
