O se tala fiafia mo le tapuaiga a mātua ma i latou uma o loo faamemelo i lenei Kolisi iloga a le atunuu, o le Aso Lulu nei e toe tatala ai faitotoa o le Kolisi o Avele auā le faaauauina o aoaoga a le fanau.
Ua lua nei vaiaso talu ona tapunia le Kolisi ona o le manatu o le Malo ua aafia soo tele fanau a le Kolisi o Avele i misa ma isi aoga.
Na tumutumu luma o le fogafale lima o le Maota o le Malo i le eleele fou a o tālia ai se faaiuga o le fonotaga lea na toe agai atu ai le Sui o le Komiti ma faiaoga o le Kolisi i le fonotaga ma le Kapeneta. O se tala fiafia na maua ina ua mae‘a lenei fonotaga ma e na o feiloaiga o le faagaeetia ma le viiga na faafoi i le Atua ona o se faaiuga ua musumusuina ai taitai o le atunuu ina ia toe tatala le Kolisi.
Ina ua fesiligia le sui taitai o le Komiti, na ia ta‘ua ai o loo iai aiaiga ua tuu mai e le malo mo le aoga e ao ona usitaia, ma o se tasi lava o ia tuutuuga ina ia aua ne‘i toe aafia fanau a le Kolisi o Avele i ni fusuaga i le lumanai.
Ua mae‘a foi ona tuu atu nisi o taiala na faatonuina ai mātua, faiaoga ae faapea foi ma le Komiti ina ia tapena atu, o auala ia e savalia e foia ai le aafia o le aoga i nisi o mataupu faapea i le lumanai. O le Aso Faraile na tea nei lea na fono ai sui o mātua, faiaoga faapea ai sui tuai o le aoga i le sailiga o auala ma fautuaga e tuu ai le tulai soo mai o misa ma aafia ai fanau a le Kolisi. O nisi o fautuaga na aofia ai le taofia o le toe faaulufale o tama ma teine mai i nuu i tua i totonu o le Kolisi ae ia tatala lava i fanau o loo nonofo i le talafatai o le taulaga.
E lē gata i lea o isi fautuaga o le fai o pasi a le Kolisi ina ia agai sa‘o mai ai lava i nuu e aumai ai fanau ma alu sa‘o le pasi i le Kolisi ae aua ne‘i toe tutū pasi nei i nofoaga faatali pasi e pei o le nofoaga lea e i Savalalo ua tulai soo mai ai fusuaga a tamaitai aoga. O nisi ua faapea mai e matuā sa taputapu ni telefoni feaveai ona toe ave i fanau. Saunoa le alii pule o lea la ua toe tatala le aoga ma o le a savali loa i fuafuaga ua faataatitia.
O le asō (Aso Lua 17 Me, 2016) o le a toe foi ai faiaoga i le laumua e tapena mo le toe a‘e o le aoga, ae o le Aso Lulu o le a faia ai se sauniga faapitoa i le Kolisi e toe a‘e uma atu ai fanau aoga. O le a iai foi le alii Palemia i lea sauniga mo sana tautalaga i tamaiti aoga o le Kolisi.
Ua iai foi le faamoemoe e ao ona auai atu i ai tama ma teine tuai o le aoga, mātua ae faapea le Komiti auā se talanoaga mo mataupu e patino tonu i le kolisi auā le agai i luma.
