O le faaiuga o le tausaga lea na tea nei na tapunia ai se tasi lenei o auaunaga na manino le malosi i le fesoasoani atu i le lautele o le atunuu ona ua leai se tupe e faatino ai.
O le faalapotopotoga lenei o le Faataua le Ola sa tele ina feagai ma galuega faafaufautua aemaise o lana telefoni sa tatala ai le avanoa i soo se tagata ua feagai ma mafatiaga o le soifua e vili atu ai ia i latou o sui o le Faalapotopotoga e faaleo le tele o faafitauli o feagai ma i latou.
O le a lava le faafitauli na nafa ma le toatele ona pau lava lenei o le faalapotopotoga sa iai le auaunaga lea e talanoa mai ai ma taumafai e ofo mai ni fautuaga aemaise o se faamalosi i le mamalu o le atunuu.
O le auga o le auaunaga ina ia aua ne‘i iai se tasi e manatu o le pule i le ola le tali o faafitauli ua feagai ma i latou i soo se vaega o le soifua.
E ui i taumafaiga a lea faalapotopotoga ae na laititi lava le seleni na maua ina ia faaauau ai aemaise i le itu o le totogi o pili o telefoni sa faaaogā mo lenei auaunaga ma le tele lava o manaoga o le ofisa lava latou ina ia mafai ai ona faaauau pea le tautua i le atunuu.
O le maliu o le tamaitai sa faauluulu i ai lenei faalapotopotoga na faaopoopo i le faigata o le faaauau ai o le taumafaiga lenei peitai o ni tamalii o le atunuu ua tutufaatasi nei atoa ai ma le laulauafono fou o le Faataua le Ola ua toe faamautu ai nei le toe tatala o faitotoa aemaise o le auauanga tau telefoni lenei mo le mamalu lautele o Samoa ua moomia se fesoasoani.
O le Afioga Misa Telefoni, lea sa tulai mai o se minisita o le faigamalo ua mavae ma o se sui Palemia foi, o ia lava na malosi le unai i le faatuina o lenei auaunaga tau faufautua i luga o le telefoni i tausaga ua tuanai, ua toe fesoasoani nei i le faamaopoopoga o le FLO, e lē gata i lea o se isi foi sa tulai mai o se Minisita i tausaga e tele ua mavae, le Susuga Hans Joachim Keil, aemaise foi le Afioga Tuatagaloa Joe Annandale ua tele tausaga o tautua i le itu tau i atinae pisinisi i faletalimalo – o i latou ia ma le komiti ua vaaia nei le FLO ua toe molimauina ai le foi mai o lenei auaunaga i Samoa.
O le amataga la o le vaiaso na tea nei na toe tatala aloaia ai lenei faalapotopotoga i lona nofoaga fou i Mulivai i le Ofisa a le Ekalesia Katoliko.
Na saunoa ai nisi o faatama a le Faataua le Ola (FLO) le Afioga ia Misa Telefoni, Afioga ia Patele Spartz Silva, le Susuga Hans Joachimn Keil faapea le Afioga Tuatagaloa Annandale i lo latou naunau e faaauau le tautua a lenei vaega o faalapotopotoga tumaoti a le atunuu.
“E tele se sao ma le tāua o le galuega o loo taumafai lenei itu e taulogologo ai le atunuu. O le ola o le meaalofa sili lea ona tāua i le foafoaga a le Silisili Ese, ma e pule foi ia i le taimi ma le aso e toe ave ai,” o Patele Spartz lea.
“Ae peitai o le vaivaiga lava lea o le tagata soifua o le fia pule i le meaalofa na foaina mai e le Atua, ou te faamalo ai i le FLO ina ua mafai ona toe tulai mai e fai se galuega laveai ma fesoasoani iai latou e lē o iloa lava le tāua o lona soifua ia te ia ma faia o ni faaiuga sese e pei o le pule i le ola,” o le faaopoopo mai lea a Father Spartz le taitai o le sauniga lotu na faapaia ai le faaauauina o nei galuega a le FLO.
Na saunoa foi le Taitaifono ia Papalii Carol Ah Chong e faafetaia le lagolago ma fesoasoani atu a nisi o a latou paaga faatasi ai ma tamalii e pei ona ta‘ua i luga, o i latou lava ua mafai ai ona toe tino ma tu mai lenei faalapotopotoga.
“I le toe tatala ai o le FLO ou te tautino atu e leai ma se sene se tasi o totoe, ae o le fesoasoani mai o le mana o le Atua ua mafai ai nei mea uma.
E ui o le faitauga mulimuli na iai le numera o i latou ua pule i le ola i le atunuu ua faaitiitia, ae e lē mafai ona nofoai ai le faalapotopotoga auā e lē muta ai lea faafitauli,” o le saunoaga lea a Papalii.
“E iai lava le faafitauli i le toatele o talavou ma tagata soifua i Samoa nei, e matamuli e faasoa lona vaivaiga o loo iai i ona mātua, lana uo, faifeau poo se isi lava tagata ona faia ai lea o le faaiuga sese o le pule i le ola.”
Na ia ta‘ua o tulafono lava ma le faiga o le galuega a le FLO e lē mafai ona faalauiloaina atu i tua faafitauli o lea tagata ma lea tagata. “Ua iai lava sui faapitoa o le Faataua le Ola ma matou foi, faatasi ai ma le fesoasoani mai a nai faafeagaiga e ala i le taulogologo i Aso Sa taitasi e maua atu ai le fesoasoani ma se fofo o lou faafitauli e aunoa ma le faataunuuina o le fuafuaga sese o loo e mafaufau e fai.”
E pei foi ona ta‘ua i se ripoti a le Faataua le Ola mai tausaga ua mavae, ua faaitiitia le numera o i latou ua maliliu i le pule i le ola i le atunuu.
O lenei lava ripoti na ta‘ua ai le tulai mai o Samoa i le tulaga tolu i le faatulagaga o atunuu pito i maualuga le numera o tagata maliliu pule i le ola i le lalolagi ae sa numera muamua i le toatele o ona tagata na fano i le pule i le ola i le Pasefika i le tausaga 1981.
Na mafai ona maua ni faamaumauga a le Faataua le Ola i le numera o i latou na maumau soifua ona o lea lava tulaga talu mai ona amatalia la latou auaunaga i le 2002. E tusa ai la ma nei faamaumauga na ta‘ua e le Taitaifono ua iai se suiga ma ua faaitiitia ai le numera mai le tele o tausaga ua mavae.
O le tausaga 2006 e to‘a 15 le aofai o i latou na faamauina le maliliu i le pule i le ola, o le tausaga e 2007 e to‘a 13, o le tausaga e 2008 e toaiva ma le faamaumauga mulimuli i le 2010 ua pa‘ū maualalo i le toafā ae na o le to atolu le fuainumera na mafai ona maua ai i le tausaga ua mavae.
“E mamafa ia i matou le pule o le toatasi i lona soifua, aua o le a fai lea ma faataitaiga i le isi tagata e ma e faailoa lona faafitauli ma e le o iloa mai foi le Faalapotopotoga lenei,” o le faaopoopo mai lea a Papalii.
O le toe faalauiloina la o le tautua a le Faataua le Ola ua toe faamanatu ai i le atunuu lana auaunaga e ala i la latou laina telefoni mo latou e fia maua le fesoasoani – Lifeline: 800 5433 (800LIFE) o le numera telefoni o le 32000 ma le imeli o le flo@samoalifeline.ws.
Na faafetaia ai foi e le FLO le lagolago mai a se tasi o tamalii mai Ausetalia ua ofo mai lona soifua ma lana taleni e faataunuu ai sana alogavaa toatasi e fai ai se sailiga tupe mo lenei lava faalapotopotoga i Samoa nei.
“O le sailiga seleni foi lenei e fuafua e toe atinae ai le FLO ma faia ai nisi o ana galuega e pei o polokalame faasemina e faia i afioaga i tua ma aoga.
O le faamoemoe lava o le toe faamanatu ma faailoa i tagata e iai lava le auala e foia ai lona faafitauli ma faataumamao ma le faia o lea faaiuga sese o le pule i le ola.”
Na mafai foi ona faalauiloa ai nisi o sui fou o la latou laulau ma sui uma o loo galulue ai i le Faataua le Ola, Taitaifono: Papalii Carol Ah Chong; Sui Taitaifono: Lisha Slade; Failautusi: Marie Toalepaialii; ma le Teutupe: Merita Wendt.
