Toe tapuni galuega o tusifolau mai Salafai

Ua faaalia le faanoanoa o nisi o le mamalu o le atunuu i le motu tele i Salafai i suiga ua faia e le Ofisa o Femalagaaiga ua tapunia ai lea auaunaga sa tua i ai le toatele o Puleono.

O le taimi tonu o le fono tele a malo laiti tau atiae a le Lalolagi le SIDS, lea na tapuni mai ai lava lenei ofisa. Sa tausavali atu lava sui o le ofisa mai i Upolu auā le faagasologa o tusifolau a le mamalu o le atunuu i le motu tele peitai o lea ua lē o toe tatalaina ma ua ta‘ua e nisi o Savaii, ua matuā telē le galuega, tele atu le tupe e faaaogā i le taumafaiga ina ia maua tusifolau ma isi vaega o femalagaaiga sa faigofie lava ona maua a o faatautaia i Savaii lea auaunaga.

O le tamā ia Tuilagi Vavae, ua sauni e malaga i Peretania ma na iloga le mafatia i le vaiaso na tea nei a o taumafai ai lona pepa folau ma na iu lava ina pue le vaa e agai mai ai i Upolu e fai le talosaga mo le faafouina o lona tusifolau.

Mo le faafouga o le tusifolau e $200 faaopoopo lea i ai ma le malaga mai i le vaa e $24 le sau ma le toe foi atu. Faaopoopo lea i ai o le $8 o le pasese o le pasi i le sau i Mulifanua i le taulaga o Apia faapea foi le alu atu e foi i Savaii.

“Afai o le tagata e sau mai i Asau e sili atu i le $50 tala e totogi auā le fealuai ai mai i le pasi ma le toe alu atu, le pasese o le alu ma le toe foi mai i Savaii i luga o le vaa aemaise o le pasese o le isi pasi lea e fealuai ai i Upolu”.

Talu ai o le isi suiga tele ua lua vaiaso e faatali ai le talosaga o se tusifolau, o faalavelave faafuasei e moomia ai le alu i fafo, ua totogi le $50 pe a moomia vave le tusifolau. O se faiga ua ta‘ua e Tuilagi ua matuā faaopoopo ai le avega i le itu tau seleni mo tagata o Savaii.
O le tina ia Pauli Moe, o le faitioga lava foi lea o le tele o le tupe ua alu i le lē mafai ai e le ofisa a le Malo ona faaauau lana tautua i le motu tele.

“Fai mai foi o le mea e lelei mo Upolu e tatau foi ona lelei mo Savaii,” o le tagi tautala lea a le tina ia Pauli Moe ma le faitio ai i le tele o suiga.

O lea na tapa se finagalo o le Ofisa i suiga ua faatautaia ma na talosagaina le tuu atu o fesili tusitusia e tali mai ai ma o loo talia i le taimi lenei lea faamatalaga. Ae e faamaonia o lea ua taofi le auaunaga i Savaii ae o le a faapea ona logo mai poo ā tonu lava nei suiga pe a alu atu fesili i se taimi vave.