E lē o toe po se lilo ile asia ai ele faigamalaga ale Aoga lauiloa mai Samoa a Don Bosco le aai nei o Kuiniselani e pei ona taunuu mai ai ile afiafi ole Aso Tofi aso 8 o Setema ina ua mae‘a le 3 vaiaso ole latou malaga na asia ai Melepone ma Sini agai mai ai i Toowoomba ma faasolo mai loa i Brisbane.
Na talia fiafia ele Matagaluega Katoliko a Kuiniselani le taunuu mai ole Aoga e toa 53 e aofia tamaiti, Puleaoga, faiaoga male afioga ia Patele na malaga mai Samoa.
O nai aso itiiti na iai i Brisbane, na malaga atu ile Dream World i Gold Coast ile Aso Faraile, ona toe taliu mai lea e tapena a latou faafiafiaga e pei ona sa tulimatai iai le toatele o tagata auā e ta‘u loa Don Bosco ua uma upu ile mataina o a latou faafiafiaga.
Na maeu foi le alofa foai o tauaiga, uo ma ē masani e ala ile faatinoina o siva Samoa i lea lava po na o latou tauaaoina ai se seleni e ova atu ile $14 afe ma ona tupu. Na matuai faamalieina le maimoa ale atunuu ile onomea o alo ma fanau ile faatinoina o faafiafiaga ma nai ata ma tala pupuu. E uma le taimi ele uma le fia maimoa male silasila aemaise nai tuaa sinasina na vaaia i lea afiafi.
Ole fofoga lava ole faamoemoe male po o faafiafiaga, ole afioga ia Leota Tominiko. Ole faletua ia Salu Hunt sa fesoasoani malosi ile afioga ia Patele Epati Tamati ile tau faasoaina o tamaiti ia latou gafa, ma mataituina le nonofo ai i Brisbane, ina ia mautinoa e toe foi uma i Samoa le aumalaga atoa ina ne‘i sola foi se isi ma tautaulia ai le faigamalaga.
Na matuai fiafia uma le aumalaga ua lē gata ile manaia ole latou tafaoga ae ole agalelei o aiga ma uo e ala i seleni e tele sa foaina mo latou.
Ole afiafi ole Aso Toonai na tea nei na tuua ai Brisbane ae toe taliu atu le faigamalaga mamalu i Samoa.
Ua misia le aumalaga e ē sa gafa ai, sa vaaia foi le aoaoina lelei male pulea o amio ale aumalaga, e ui lava sa motu mai male taula, peitai na molimauina lava le faaalia pea o tu ma aga faaaloalo i aiga sa api ma nonofo ai.
