Na leai se popole o nisi o tagata o le atunuu i le auai i le lotu i le Aso Sa, ae sa sili ona popole ina ne‘i leai se avanoa e maua i le fomai Isaraelu ia Will Shannon lea ua aave tala i ana vai faalenatura lea ua toatele tagata ua manuia ai. O le faaiuga o le tausaga ua mavae na toai taunuu mai ai i laufanua lenei fomai faatasi ai ma nisi o tamalii o le atunuu e faalauiloa le tāua o lana fomai i tagata o Samoa o loo i Aotearoa.
Ae na molimauina ai i lea polokalame le silia i le 800 tagata na autovaa atu ma faaaogā lea avanoa tāua, ma o le tala ave na faasalalauina e nisi sa auai muamua le telē o le tāua o vai nei i le soifua maloloina o le tagata.
O se oso lelei na manuia ai le toatele o tagata i le polokalame muamua ma sa avea lea ma auala ua faasalalau atu ai le tala lelei i nisi o aiga na lē talitonu ma masalosalo ma ua naunau ai i le isi avanoa e taunuu mai ai le fomai i Aukilani.
O le mae‘a ai o le polokalame muamua na toe liuliu ai le tofa ma le faautaga i le susuga ia Tuia Pu‘a Letoa o lē o loo taitaia mai lenei aumalaga ina ia toe ala usu mai i le amataga o le tausaga e faataunuu se isi siaki i Aukilani, auā ua maitauina le toatele o tagata e lei mafai ona siaki ona ua puupuu le taimi.
O le taeao o le Aso Sa 24 o Ianuari na toe ala usu ai le toatele o tagata i le hall a le Ekalesia Aso Fitu Tutoatasi i Magele e tulituli avanoa ia Will Shannon e fai siaki lea e silia i le 1,000 tagata na vaai ai, na solosolo lelei le faatinoina o le polokalame auā sa toatele i latou sa galulue faatasi auā le faasoasoani o le mamalu o le atunuu e vaai le fomai.
E maofa le toatele o tina ma tamā matutua sa auai ona e leai se gasu o siaki, na o le resitala muamua lava o le suafa ona alala lea i nofoa e faatalitali ai le gasolosolo i totonu o le potu o loo iai le fomai.
O nisi o tagata sa auai i le siaki muamua a o lea ua toe auai i lenei faamoemoe ona ua talitonuina e latou le tāua ma le suiga tele o lo latou soifua.
O le susuga ia Talatoa Mafutaga sa nafa ma le faasoasoaina o le atunuu i totonu e vaai le fomai, e tai tolu sefulu tagata e auai i le vaega.
Ae o le mea e ofo ai tagata e leai ni siaki tele e faia, na o le vaai lava o le fomai i mata (fofoga) ona ta‘u ane lea o le gasegase o loo e maua ai, ma le vai e aogā ai, ona faagasolo mai lea i fafo i nisi o tamalii ma faletua o loo galulue ai auā le faia o le talavai ma le faamalamalamaina o le faainuina o vai ma le aogā o vai i le soifua o le tagata.
O le afioga ia Tuia Pu‘a Letoa ma le afioga ia Taatitimanaia Maiava Visetoka Peteru faapea le susuga ia Talatoa Mafutaga o sui ia na malaga mai Samoa a o le fomai ia Will Shannon na malaga sao mai Ausetalia.
E tasi le aso sa faagasolo ai le polokalame lenei i Magele ae o le Aso Gafua aso 25 na see atu ai i le itu i Sisifo o Aukilani i le hall a le susuga i le toeaina ia Rev Faamalua Peteru mo le faataunuuina o le siaki mo le mamalu o le atunuu o loo alala ma aumau i le aitu i Sisifo. Ma o le suiga tele lea ua iai le amataga o le polokalame i le amataga o lenei ua mafai ona faasafua o Aukilani atoa.
O le aso 26 ma le 27 o le a see atu ai le fomai ma lana team i Ueligitone i Lower Hutt e tufa ma faasoa atu ai lea manuia mo Samoa o loo alala ai i lea itu o le atunuu. Ua silasila foi le fomai ma le afioga ia Tuia Pu‘a Letoa i se polokalame mo Kalaiesetete ma Napier i se taimi o muamua.
Ae o le agaga fiafia ma le faafetai a le atunuu o loo autovaa atu i lenei polokalame, o le maua lea o le avanoa o loo faatau ai le vai i Aukilani e pei ona faatauina i le maota o le faafeagaiga ia Matafala Lesa i Mount Wellington.
O le lipoti a le afioga ia Tuia mai lea nofoaga, na mae‘a siaki i le faaiuga o le tausaga ua mavae, ae sa gasolo lava tagata e faatau le vai mai le maota o le faafeagaiga, ma e lē misi aso o le vaiaso i le taupati atu o le atunuu.
O se fiafiaga sili lea i le alii fomai ia Will Shannon ma le aumalaga ona ua mafai ona faasoa atu le meaalofa mai le Atua i tagata Samoa i Niu Sila ma manuia ai, ma o le viiga sili lea o le Atua.
