Ose faifeau ua aveesea uma ona tofi ina ua molia e leoleo ini moliaga tau faiaiga fai faamalosi ma le faiaiga ma se teineititi ei lalo ole 16 tausaga le matua, ua toe suia nei lana ioega i moliaga i lona tetee, ma ua toe faatalia ai nei se aso e toe valaau ai le mataupu ile Faamasinoga Maualuga e sailia ai se aso e toe valaau ai mo le suesueina o molimau a leoleo.
Ole susuga Aukuso Tupa’i oloo tuua’ia i lona faia o ia solitulafono ise teineititi sa nofo a’oga ia te ia ma lona faletua a’o faia’oga lē ua molia ile kolisi ale ekalesia Metotisi i Samoa sa galue ai ose faifeau.
O faamaumauga a leoleo ua ta’ua ai ole teineititi na aafia na faamalosi e Aukuso ma faapena ona faaauau ai pea ia gaioiga solitulafono seia oo ina ma’itaga le teineititi ma fanau ai sana pepe.
Na valaauina lē ua molia ma lona aiga e tausia se aulotu i Neiafu i Savaii ma avatu ai ma le teineititi ma latou nonofo ai ma tausi le lafumamoe. Peitai na toe osofai ai e tuinanau ole tino o Aukuso le teineititi ma toe ma’itaga ai lē na aafia ma fanauina le pepe lona lua.
Ole tetee a lē ua molia ona o lana mau sa ioe ma malie le teineititi, ae nate lei faamalosia. Peitai ole taimi muamua na fofogaina ai le mataupu a’o tauave e se isi loia lana mau tetee ile amataga o suesuega sa suia ai lona mafaufau ma ioe loa i moliaga e lima ole faiaiga fai faamalosi ma le moliaga e tasi ole faiaiga ma se teineititi ei lalo ole 16 tausaga le matua. Ole teineititi na aafia ole tama teine ale uso o lona faletua. Ole aso na faatulaga e lau ai le faaiuga ale faamasinoga na oo atu ai se isi loia e tulai mo lē ua molia ina ua toe tetee Aukuso i moliaga, ma ole mafuaaga lea ole toe faaui i tua ole isi loia na tauaveina muamua le mau a lē ua molia.
Ole vaiaso nei e toe valaauina ai le mataupu ile Faamasinoga Maualuga e faamautu ai se aso e valaau ai molimau ona oloo fia maua ele loia ua tauaveina nei moliaga o lē sa avea ma faifeau faamatalaga uma o moliaga a leoleo.
Ole afioga ile Faamasino sinia Vui Clarence Nelson oloo seei ile suesueina o lenei mataupu. Ole susuga Aukuso sa faamautu ile nofoaga autu ole ekalesia Metotisi i Faleula ile taimi na amata ai ona tupu le solitulafono.
