Ua tuu aulafo le pulega o le Iunivesite aoao a Samoa i se finagalo o le Malo e faaauau ona sue fanau e to‘a 327 e lei totogia pili ma nisi ua totogi se vaega, ae aua ne‘i tuuina i ai le faaiuga o a latou suega poo togi pe afai e uma le suega e lei oo atu lava ni seleni o pili.
O le taunuuga lea o le mataupu na taofia ai e le pulega o le iunivesite le sue o ia fanau ina ua amata suega faaiu o le tausaga i le lua vaiaso ua mavae, ona ua lē totogia pili ma nisi e lei mae‘a.
O le mafuaaga lea na sulufai ai nisi mātua i le taitai o le Malo i le alii Palemia, mo se fesoasoani ina ua oo atu nisi o mātua i le aso na amata ai suega ua tapuni le faitotoa ua lē toe talia ni pili e totogi ona ua uma le avanoa na ave i ai e totogi ai pili o fanau.
Na faaalia e le Tapaau poo le Pule o le iunivesite le afioga Fui Tuua Ilaoa Dr Asofou Soo, o lea faaiuga a le iunivesite na mafua i le lē tausisia e mātua o aiaiga o le totogiina o pili lea na ia ta‘ua o le mea muamua lava lea e faailoa i mātua ma tamaiti pe a faatumu pepa o le ulufale atu mo aoaoga i le iunivesite.
O se taimi umi o loo tuu avanoa ai le iunivesite i mātua peitai o le faafitauli lava lea i tausaga uma, ma o le mafuaaga foi lea o le liliu o le pulega ma fai loa le faaiuga e tatau ona fai auā o le iunivesite a le atunuu o loo feagai ma tulaga i le manaomia o seleni e faatino ai ana galuega.
O le vaiaso nei i le Aso Lulu, 21 o Novema 2012 o le a toe sue ai fanau e to‘a 120 i le vasega faavae poo le Foundation sa lē sue ona o pili aoga.
O lea foi aofaiga e 120 o loo aofia ai ma nisi o fanau o loo aooga mo tomai faamatata eseese poo le vaega o loo aooga mo tomai e pei o le faakamuta, soo uamea, inisinia, fai eletise ma le fau meafale. O le isi vaega toatele o le aofaiga e 327 o le a faato‘ā sue i le tausaga fou i le aso 7 o Ianuari 2013.
O fanau ia o loo aoaoina i le sailia o faailoga maualuluga faapea i latou o aooga faafaiaoga ma le tomai faatausi soifua.
O le a lē suia aso ua atofaina mo faauuga a le iunivesite i le masina fou lea e faia i le aso 11 ma le 18 o Tesema 2012 i le toe sue ai o fanau e lei totogia pili e pei ona faailoa e le pule o le iunivesite i se feiloaiga ma mātua ma fanau sa lē mafai ona sue.
O faauuga foi o le a faia i le amataga o le tausaga fou o loo tumau pea i aso ma masina ua faatulaga e le pulega. E aliali mai i le faaiuga ua taunuu i ai le kapeneta ma le pulega o le iunivesite i lana fono faatonu o le a toe foi lava i le faiga sa iai muamua i tausaga ua mavae, e mafai lava ona su’e le tama ma le teine e lei totogia le pili pe lei uma foi ona totogi, ae e lē mafai ona faauu ma ave i ai ona togi seiloga ua silasila le pulega i mata o seleni o pili.
