Ua faitau vaiaso talu ona lealea i luga o upega tafailagi  le toe sainiina lea ole konekarate ale susuga ia Anthony Milford e faatumauina ai pea lona soifua taalo mo le ‘au ale Broncos.

Ua faamaonia mai ile vaiaso ua tuanai le faataunuuina lea o lenei sainigalima e aloaia ai lenei feagaiga a Anthony ma le ‘au malosi ale Broncos a Kuiniselani mo le isi 4 tausaga ile tupe e miliona ile tausaga, poo le 4 miliona ile 4 tausaga.

Ose fiafiaga tele lea ile finagalo ole Coach ale Broncos, Wayne Bennett auā o Anthony ose fetu pupula ile ‘au, e le fesiligia le naunau o Bennett e taofi pea Milford mo le Broncos. Ua sainia nei lenei feagaiga seia aulia le faaiuga ole 2021, ma ose fiafiaga tele ia Anthony ma lona aiga.

Ole tumutumuga ole mafaufau o lenei alii talavou e 22 tausaga ina ia faamuamua lona aiga, ole ala lea ua tumau ai lona manatu e taalo pea mo Broncos e ui na iai foi le ofo ale Stormers sa tuuina mai mo ia, peitai, na manino lava le manao e fia taalo mo le Broncos.

Ua ia tautino foi e fia taalo pea mo le kalapu ua ia talitonuina foi ole a tata’i ai ala tonu mo lona lumanai a’o toe tuli ai le isi fa tausaga o lana miti ile soifua taalo ile lakapi liki.

E le  gata o ia vaega ae ua tele foi lona sao mo le ‘au ale Toa Samoa e pei ona lausilafia ai. Ole faanaunauga ma le mitamitaga foi o lona loto ia maua se avanoa e faasoa atu ai foi lona tomai i nisi o alo ma fanau oloo taumafai ile taaloga.

Ose talavou e usitai tele i ona mātua aemaise le aiga, e toaga ile lotu, e tumau pea ona uiga tausaafia ma le faaaloalo ile tele o tagata.

O nai ona mātua o Ale Halo Milford mai Fasitoo faapea si ona Tina ia Polu Milford mai Nofoalii.

Comments

comments