Ua mae‘a le fono a le Vaega faaupufai e Puipuia Aiā Tatau a Tagata le HRPP ma ua toe tasi ai le faafaletui ia Tuilaepa Lupesoliai Sailele Malielegaoi e avea ma taitai o lea vaega faaupufai i le aga atu ai i le faiga filifiliga a le atunuu i le masina fou o Mati. O lea filifiliga ua aofia ai foi ma le tofia o Fonotoe Pierre Lauofo, e avea ma sui taitai o lea vaega faaupufai.
O nei filifiliga na faatautaia i le mafutaga e faamautu ai sui o le HRPP i le palota o le aso 4 o le masina o Mati o lenei tausaga, e pei ona faamautu ai le to‘a 80 o sui o le vaega ua tamomoe nei mo le fu‘a a le HRPP ma sui o loo taufetuli mai i le tulaga o faipule tutoatasi ae ua sainilima uma a manuia a latou taumafaiga o le a agai sa‘o lava i le vaega faaupufai lenei mo le tautuaina o nofoa o o latou itumalo.
E iai lava faamatalaga o loo faasolo i le tulaga o iai le lē mautonu o le tulai mai o le vaega faaupufai lenei e ui o le matuā toatele lava ua siilima e lagolagoina lea vaega faaupufai.
O lea lava e iai faamatalaga e ui o loo teena e le taitai, o loo iai se isi vaega faaupufai o loo taumafai ni sui o le HRPP e faatuina i le mae‘a ai o le faigapalota ma o iina lea ua faapea mai ai nisi e eseese lava vaega i totonu o le HRPP ma o nisi o sui minisita, minisita lagolago ma nisi o faipule ia ua foliga mai ua taumafai e fai se latou lava potopotoga ese mai ia i latou ua lagolagoina pea le taitaiga a Tuilaepa Lupesoliai ma nisi o sui minisita o le kapeneta.
E iai foi isi faamatalaga faapea o loo iai nisi ua tutufaatasi e faufau ma nisi o le Vaega a le Tautua Samoa ina ia agai mai i le mae‘a ai o le faigapalota ma faatuina se latou lava vaega e ono tulai mai i le malo, a lē o lea pe agaia foi le Malo.
I aiaiga ua iai foi sainigalima ua faia i le va o le Tautua Samoa latou ma ana sui tauva, ua molimauina ai e silia ma le to‘a 30 lava i le motu o Upolu ia na sainilima i le faaiuga o le lua vaiaso talu ai mo le tauva ai i lalo o le fu‘a a le Tautua Samoa.
E lei aofia ai sui mai i le motu tele i Salafai lea na faatoa agai ane i le vaiaso na tea nei mo le sainigalima lea e faamautu ai le vaega faaupufai a le Tautua e tauva mai ai.
E 171 suafa ia na lauina i le faasalalauga aloaia o sui tauva ua mae‘a ona lesitala mo le faigapalota o le 2016 ma o se numera tele lea pe a fuafua atu i faigapalota na faia i tausaga ua mavae.
Ua faamautu mai e to‘a 7 tamaitai ia e tauva i lalo o le fu‘a a le Tautua Samoa ae to‘a 12 tamaitai ua tauva mai i le fu‘a a le HRPP ae lē taulia ai tamaitai ua tauva o sui tutoatasi ma o se suiga tele lenei i le unai na molimauina i le lima tausaga ua tea atu, ina ia siitia le numera o tamaitai e ofi mai i le Palemene i le isi paeaiga o sosoo ai nei E toatasi lava le sui faipule lea e lē o iai sana faigapalota i lenei faiga filifiliga o le faipule lea o Satupaitea, le afioga Lautafi Selafi Purcell lea e leai se tasi la te tauva i le faigapalota tele o loma nei.
