Toe olaola le YFC i Niu Sila

O le tausaga e 2006 na lē toe faalogoina ai se leo o se YFC i totonu o Niu Sila seia oo mai i le tausaga ua mavae 2015. O se taimi umi sa motusia ai lea faalapotopotoga i totonu o lenei atunuu auā o se tasi lea faalapotopotoga o loo tele se anavatau o loo tulai mai ai le lelei o ekalesia aemaise o aiga faatasi ai ma le faatalaleleina o tupulaga talavou.

I totonu o lea taimi umi na iai nisi o papalagi na latou toe taumafai e lalaga lenei mafutaga i totonu o Niu Sila, ae lē mafai, ona e iai nisi o vaega e tatau ona moomia atoatoa.

Ae o le tausaga 2012 na amata fausiaina ai loa se faalapotopotoga a tagata Samoa sa auai i le YFC Samoa i le tele o tausaga ua mavae le Alumni, e aofia ai nisi o faafeagaiga ma o latou faletua, faapea nisi o tamalii, o faletua ma tausi ma fanau o loo ua aumau nei i Aotearoa ua mafai ona auai i lenei mafutaga. Sa latou amatamea e ala i le anapogi ma le tatalo ma le manaoga ina ia mafai ona toe faatuina se isi galuega fou poo le YFC Samoa i totonu o Niu Sila.

O le 2014 na savalia ai loa e nisi o sui o le YFC Samoa Alumni nisi o alii papalagi o le YFC i le lalolagi o loo aumau i Ausetalia i lenei manaoga, ae peitai sa teena se lagona ona afai ae fai se YFC Samoa, o lona uiga o tonu ma polokalame uma e tatau ona aumai mai Samoa le faatinoina o le galuega.

Na toe liliu se lagona o le aveai ma faaoo ai se manatu e fai se YFC Pasefika, ae aumai foi le tali, afai ae faatuina se YFC Pasefika o lona uiga e tatau ona faanoi i papalagi o loo taitaiina lenei faalapotopotoga. Ma o le tu‘itu‘i pea o le Alumni na tafa ai loa se finagalo o i latou o loo faauluulu i ai, e tatau loa ona fai se YFC Niu Sila.

O le afiafi o le Aso Sa, 21 o Fepuari na tatala aloaia ai loa le YFC Niu Sila i le malumalu o le Ekalesia Aso Fitu i Onehunga. 

O tagata o atunuu eseese na militino faatasi ai e molimauina le tatalaina o lenei faamoemoe, faapea ma susuga i faaafeagaiga Samoa sa latou auai i le YFC i Samoa.

O le susuga ia Ps Doug Allington o le taitaifono o le Board na saunoa e tatala aloaia lenei polokalame, faatasi ai ma faafiafiaga na saunia e le Alumni Samoa i Niu Sila e ala ia latou pese faapea ma le fanau na faatinoina siva faitaga.

O le susuga ia Rev Rolani Mika sa fai ma sui o le Alumni Samoa e saunoa i le manulauti a le Alumni o loo taumafai nei i ai i totonu o lenei atunuu. Ma o lenei polokalame o loo taulamua ai le Alumni Samoa i lona faatinoina, auā e lē o mafai ona maua ni sui mai Fiti ma Tonga latou te tauaveina le fu‘a mo ia atunuu e lua ae ua na o Samoa lea ua mafai ona tulai mai i lenei taimi.

Na mae‘a le polokalame i lea po ona sosoo lea ma le ipu ti māmā na saunia e le Alumni. O Ps Doug Allington o loo avea nei ma taitaifono o le Board faatasi ai ma le susuga ia Ps Isaia Lameta o loo avea ma failautusi faapea le tamaitai o Nifo Tofi.

Ua mautu nei le tatalaina o le YFC ae ua faagasolo ai foi ma semina mo nisi e faigaluega i le faatinoina o le galuega. Faatasi ai ma le sailia o nisi mai Fiti ma Tonga ina ia mafai ona faatino le faamisiona a le YFC i le lalolagi.