Ole lomiga muamua ole Samoa Times ile amataga o galuega o lenei tausaga aso 9 Ianuari 2018, na lipotia ai se tamaititi aoga talavou 11 tausaga o Uili Papalii na ia fafagaina se tamā e leai se mea e nofo ai o Robert Millar i lana meaai mo le aoga (lunch) ma foai foi iai tupe ta’i $5 i taeao uma. Sa maua e Millar le tala e faatatau i lea lipoti ma ia faafesootaia mai ai le Samoa Times ma faapea mai, “O Uili ole toa (Hero).”
Ole auga ole fesootai mai o Millar ile Samoa Times e fia faafetai mai ile Samoa Times mo le lipotia o lea galuega lelei na faia e Uili mo ia, ma maua ai ma le avanoa e tuuina mai ai ma faamatalaga ile galuega alofa a Uili na fai mo ia.
Na ta’ua e Millar, “E silia ile lua tausaga o o’u nofonofo solo ile auala, e leai se fale, leai se taavale poo se uo foi e talanoa iai i aso uma”.
“Ole afaina o lo’u aiga ina ua ma tetea ma lo’u toalua ile lua tausaga talu ai, na suia atoa ai lo’u lalolagi, ua sola lo’u fiafia e peiseai ua leai se faamoemoe o totoe mo a’u, ua leai se malosi ia te au e mafai ai ona ou faia se mea lelei mo a’u lava ia, e oo lava ise meaai oute faatauina mo a’u ua lē mafai lava.”
Na tagi Millar i luga ole telefoni ina ua ia toe taumafai e faamatala mai ile Samoa Times le lagona ua iai nei ia, e faatusatusa ile taimi na maua atu ai ia e Uili. Na ta’ua e Millar, “E maua atu a’u e Uili ua alu lo’u tino mai le 100 kilo sa iai ile 58 kilo. E lē gata ile leai ose meaai ae ua lē manogi foi se meaai ile mamafatu o lagona ole leai ose faamoemoe. Oute fia ta’utino atu, o Uili na ia toe faafoisia a’u ise faamoemoega fou”.
“Ina ua oo le tala ile nusipepa ale Herald ma lipotia ai le galuega lelei a lea talavou na ia faia mo a’u, sa faitau ai le toatele, ma ofoina mai ai ese tamaitai se galuega valifale mo le 3 masina mo a’u oute faigaluega ai ile Kawerua Hotel, faatasi ai ma le potu ile Hotel oute faamautu ai”.
“I totonu ole tolu masina lea sa ou faigaluega ai, na maua ai la’u taavale oute fealuai ai. O lea ole a faaiu la’u galuega valifale ile Kawerua Hotel, peitai o lea ua iai le isi a’u galuega lea oloo faatali le taimi oute amata ai pe a faamae’a la’u galuega ile Hotel”. Ole agaga fiafia o Millar na faailoa mai, ona sa leai se mea e nofo ai, sa leai se faamoemoe nate toe gafatia ona faatau sana meaai ma totogi se nofoaga e nofo ai, a’o lenei ua fai lana taavale, ma maua lana galuega”.
Na ta’ua e Millar, “A’o o’u nofonofo ma moomoo ile fiaai ma fiainu ile auala, e toatele tagata latou te lē o iloa, ole meaai ma le vaiinu le vaega itiiti o lo’u manaoga, ae ole maua ose uo e talanoa iai ina ia ou toe maua lagona lelei faaletagata soifua le manaoga sili sa iai i totonu ia te au.”
Na ia ta,ua foi, “O Uili le tamaititi aoga talavou 11 tausaga na ou maua iai le tali o nei manaoga uma, ua lē gata na foai mai mo a’u lana meaai i aso uma, ae o tupe, faatasi ai ma lana talatalanoa mai ose uo, ua ou toe manavaina ai le ola mai le lua tausaga talu ai”.
Oloo iai pea le fesootaiga vavalalata a Millar 60 tausaga ma le tamaititi aoga 11 tausaga o Uili ma lona aiga, ose faigauo e talitonu Millar e lē mafai ona ia faagaloina.
(Silasila ile tala oloo faaulutalaina (Aofia Uili Papalii faailoga taualoa Herald 2017) ile lomiga muamua ole Samoa Times 2018, ete maua i luga ole upega tafailagi Samoatimes.co.nz
