O le aso 18-20 o Me i Sini nei o le a lolofi atu ai matua ma fanau auā ni aoaoga ma toleniga i le taaloga soka o le a faafoeina e le alo iloga o Samoa i le Soka ia Tim Cahill. O Cahill o loo aumau i Egelani, lea o loo taalo ai mo Everton i se tau e $3miliona Pauni i le tausaga.
O se avanoa lenei e feiloai ai nisi o alo ma matua mo le taimi muamua ia Cahill lea o loo avea pea ma fetu pupula i le soka a Ausetalia talu mai le Ipu o le lalolagi i le 2006/2010.
E le gata i Ausetalia ua iloga foi lenei alo o Samoa i Peretania, Europa ma Asia i lana taalo mo lana kalapu iloga o Everton i le liki Soka i totonu o Egelani.
O Everton lea na manumalo mataina talu ai i lana taaloga ma Fullham i ni ‘ai maoa‘e e 4-0. O se tasi o nei sikoa na maua e Tim lea e atoa i ai latou ‘ai e 4. O lana uo o Mark Swarzer lea e Goalie ia Ausetalia na mafatia i lea taaloga aua o Mark sa Goalie mo Fullham.
E le toe faalauiloaina le lotonuu o lenei alo o Samoa e pei ona ia taumafai pea i soo sana faatalatalanoaga e faia ma tusitala e faailoa lona tupuaga Samoa ma nai ona tagata.
O le mafuaaga lava lea na ta ai lana taulima Samoa i lona tau‘au agavale. O le susuga Tim Cahill o lona tina e mai le afioaga o Salailua ma Tufuiopa, peitai o lona tama o se alii papalagi Ausetalia ma Egelani.
O lenei aoaoga i le aso 18 ma le aso 20 o Iuni, o lana tautua lenei mo fanau talavou lea e aofia ai ma nai alo o Samoa mai pitonuu o Campbelltown, Liverpool ma Bankstown, ina ia faamalosia le tuliloaina e fanauiti o a latou miti e fia avea ma ni fetu pupula o le soka i le lumanai.
Tautino Cahill o lana miti foi lea na iai a o talavou, lea lava na tuliloaina ma faamanuiaina ai o ia. Ua valaaulia ai foi o ia e le Polokalame a le Liki le ‘Footy Show’ i le TV9 a o iai i Sini Cahill.
I itu tau seleni e faitau miliona tala o loo totogi ai tama soka lelei o le liki a Peretania (English Premier League) e pei ona faamanuia ai Tim Cahill. E ui i nei faamanuiaga ma le tamaoaiga, o loo manatu mai pea lea alo o Samoa i le tupulaga talavou a Sini lea na fofoa atu ai lana taalo.
Na malaga foi o ia i Samoa i tausaga ua tea ma faia ai nei aoaoga, faapea foi ona foai ai ni meataalo mo aoga ma kalapu eseese.
Ua nofo sauni nei tupulaga Ausetalia e feiloai atu i lenei fetu pupula lea ua pine ai le matatia o le uluai Socceroo na sikoa i le Ipu o le lalolagi i le 2006, faapea le lua ai o ana sikoa i lea taaloga ma Iapani. Faapea foi le toe faaluaina i le Ipu na faia i Aferika i Saute i le 2010.
O le lotonuu o Tim Cahill ina ua taalo mo Samoa i lana aufili lalo o le 17 tausaga i le tausaga e 1994 na semanu e lepetia ai lona taalo mo Ausetalia i le Ipu o le lalolagi. Ae peitai ina ua talia lana talosaga e liliu atu e faalautele lana taleni, na vaaia le alu atu o ia ma faamanuiaga mai le tapuaiga a si ona atunuu pele lea ua sapi ai nei Tim Cahill.
