E tau lē fesiligia le aano moni ma le faamoemoe autū e faia ai ni mafutaga toatele a ni aiga potopoto. E tasi lava lona mafuaga o le faamasani ma le mafuta faatasi o mātua ma fanau o loo nonofo valavala.
O i foi e iloa ai e le isi tagata suli moni ma tagata moni o lona aiga. Ua taunuu ai upu a le atunuu, ‘O lupe sa vao eseese a ua fuifui faatasi,’ ae alaga ai ma le faisalamo o Tavita, ‘E se mea ina lelei o uso ae nonofo faatasi.’
“O lou Aiga o lou Tofi”, O le sini autu lea na laualuga i ai le faamoemoe o le aiga o Tiatia Fa‘afiatoe i Gataivai e ala i le latou faamoemoe sa faataunuuina i le Aso Lulu, aso 24 o Tesema seia oo atu i le Aso Toonai, aso 27 o Tesema, 2014.
O aiga mai Amerika, Hawaii, Niu Sila, Ausetalia, Amerika Samoa faapea Samoa sa auai uma i lenei mafutaga. Sa tumutumu le nuu o Gataivai i lea vaitaimi o le Kerisimasi ma le Tausaga Fou auā foi o se taimi muamua lea ua faataunuuina ai lenei tuufaatasiga i totonu o lenei aiga.
O le Aso Lulu 24 o Tesema na tatala aloaia ai lenei faamoemoe, ma o le susuga i le tausi matagaluega o le Ekalesia Metotisi i Gataivai ia Rev Amosa Tupai na ia taitaiina le sauniga i lea aso ma amata faagasolo ai loa polokalame o le mafutaga.
O le aso muamua lava o le faamasani ma le faailoaina o faletama o aiga taitasi faatasi ai ma le pese faafeiloai na tapena i ai aiga o loo nonofo i Samoa. Sa faapea foi ona faafofoga ai le aiga lautele i le gafa o le aiga na fofogaina e le Sa‘o o le aiga le tofa ia Tiatia Ieremia.
Na saunia foi aitema eseese i po taitasi mai atunuu sa auai o latou sui faapea le pese faamavae na lagiina lea e le aumalaga mai Aukilani Niu Sila.
O le polokalameina o lenei faamoemoe na taulamua ai le toe Ulutaia o le aiga le tamā ia Tiatia Sunia, o ia lea o le suli o le tamā ia Tiatia Fiatoe, o loo soifua mai i le taimi nei faatasi ai ma suafa o le aiga.
O le galulue faatasi o tagata uma na maitauina ai le leai o se vevesi ma se faalavelave e tupu, ae na vaaia ai laufofoga o le fiafia ma le fealofani i tagata matutua aemaise lava o le fanau. O nisi o fanau na malaga atu i fafo na vaaia le sagisagi fiafia i le faatinoina o feau auā sa faafefiloi ma vaevaeina i vaega e tolu le aiga i le faagaioiina o tiute.
O le Aso Toonai 27 o Tesema na tapunia ai loa lea faamoemoe i le sauniga na taitaia lava e le susuga i le faafeagaiga ia Amosa Tupai ae faaiu ai loa i le toonai faatasi a le aiga i le Aso Sa ma faamae‘a ai loa lea mafutaga.
O le Aso Toonai lava lea sa faaee ai ma le suafa Gapao i nisi o suli e toafitu o le aiga, o ē o loo alala i totonu o le nuu faapea nisi o loo aumau i atunuu i fafo auā lava le tautuaina ma le agai i luma o le aiga mo le lumanai.
O se tala otooto o le aiga: E 8 i latou na tupuga mai i le tamā ia Tiatia Fiatoe ma Rasela, e 4 tama e 4 foi teine, ua maliliu uma le toafitu ae totoe ai o le tamā ia Tiatia Sunia o loo soifua mai i le taimi nei, o loo nonofo i laua ma le tina ia Patricia i Ueligitone.
O le aofaiga atoa o i latou na tupuga mai i nei mātua e 471, e lagona ai lava le faafetai i le Atua ona o lona alofa i totonu o le aiga, ua iai nei le faamoemoe o le tausaga 2019 o le a toe faataunuuina ai le isi Reunion i Samoa lava pe a tusa ai ma le alofa ma le agalelei o le Atua.
