Toe maai mai matiu‘u o le Manu ua tuai

Na alalaga fiafia le tapuaiga a le Manu Samoa i soo se tafa o le kelope na tu‘i mai ai le mulipapaga mo la tatou taaloga faaiu o le Ipu ma Sikotilani i le sikoa mataina a Sakaria Taulafo semanu e sili ma manumalo ai le Manu i se taaloga mataina.

Na toatele lava foi le aumaimoa sa vaai i luga o le televise na masii atu ma nisi o aumau i Peretania ma Europa na matuā sii atu le fala siigata. I le suiga na iai le ‘au mai le taaloga ma Iapani sa toe taliu mai ai Faatoina Autagavaia i le uigi e sui Alesana Tuilagi ma George Pisi i lona tulaga masani o le Centre ae foi Paul Perez i le uigi taumatau.

Faatoa filifilia ai foi Alafoti Faosiliva i le numera valu e suitulaga ia Ofisa Treviranus lea na tauaveina e Kahn Fotualii le tofi kapeteni. O le toe taliu ane o Maurie Faasavalu i le numera ono e pea ma le fetu pupula ia Jack Lam na iloga le malosi i polo lusi ma le puipui.

Na muai sikoa le Manu e lei atoa se sefulu minute mai ia Tusi Pisi i le tulimanu ma ova lana kiki mo ‘ai e 10-3. Na vaaia le maopoopo o le foueki ia latou osofaiga mai sikalamu molo ma polo e togi i laina e le hooker ia Maatulimanu Leiataua.

O ia foi lea na maua le sikoa lona lua a le Manu Samoa e tali ai i se sikoa foai mo Sikotilani lea na pasipasi mamao mai ai tua o le laina luasefululua a tatou lava.

O le sikoa mataina a Sakaria Taulafo i tafatafa o le pou na semanu e vala ai loa ‘ai i le malologa na amta mai i se gaioiga mataina na pasipasi solo ai le Manu mai le itu agavale ma toe taliu atu ai i le taumatau ma iu ina sikoa ai Taulafo.

Ae i se vaaiga ua avea ma masani na liliu e le laufali le sikoa ma faasala George Pisi ina ua tomumu le ‘afa a sikotilani ia Greig Laidlaw i le Laufali na taofiofi ia e Pisi i luga o le laina.

O le tulaga masani lava lea na iai o le taufao o ‘ai auā o sikoa a Sikotilani e tele lava mai la latou foueki lea e lelei tele i le unai faatasi i molo ma rucks e faaaogā i ai le uumi ma le mamafa o la latou laina i luma ma e ta le ‘afa o sili Samoa ina ua toe sikoa i le tulimanu Reynold Lee Lo lea na mataina tele lana osofaiga o le laina i tua a Sikotilani mo ‘ai Manu 26 Sikotilani e 23.

I le ‘afa faaiu na afaina le Manu i le tele o sala ma ova ai kiki a Laidlaw ae o le pue na afaina ai Sikotilani i le toasa o le Samoa lea ua suia atoa lona malosi mai le vaiaso talu ai.

E tusa o le minute 75 o le taaloga na laasia ai loa e Motu Matuu le hooker le laina sikoa i se pasi mataina a Jack Lam mo ‘ai Manu Samoa 33 Sikotilani 36. Na taumafai malosi atu le Manu i toe minute mo se isi sikoa poo se sala e tutusa ai ae peitai ua uma le taimi ma taualuga ai se taaloga mataina.

O se vaaiga faamomoiloto le tootuli ane o tama taaalo o le ‘au a le atunuu e sii le viiga ma faafetaia le tapuaiga a le atunuu sa faanoanoa tele i taaloga ua tuanai ae peitai ua toe vaaia le Manu tuai ma ua toe faafiafiaina le tapuaiga e ui o le sikoa faaiu.

Ua moni ai le upu, “E ui o le malolo ae o le malolo lava a le Tamalii.” Ua taliu nei i fanua le Manu Samoa ae ua sao atu Sikotilani ma Aferika i Saute mo le valu pito i luga.