Ua silia nei i le sefulu tausaga e lē o toe faia ni tauvaga pese a le Ekalesia PIPC e pei ona masani ai i tausaga uma, ona o le pisi ma le lē maua o avanoa i ekalesia e faaauau ai nei mafutaga, ae o le tausaga lenei ua toe laga ai se lagona o le susuga i le faatamā o autalavou a le matagaluega ia Rev Apelu Tielu, le peresetene le susuga ia Seaga ma le laulau ma le komiti ua iai se manatu o le a faaauau pea mafutaga faapenei mo autalavou ma tupulaga ina ia tapue ai pea le fiafia o le tama ma le teine e alu i le falesa ma nofo i le nofoaga o le aufaipese.
O le Aso Toonai ua mavae na toe tumutumu ai le hall a le Ekalesia PIC i Papakura i aulotu e 4 o lenei matagaluega aemaise o aiga ma uo na lolofi atu e maimoa ma faalogologo ma lagolago i aufaipese taitasi o lenei pulega o loo auai i le tauvaga.
O le ekalesia i Otara o loo iai le toeaina ia Rev Elder Lemuelu Aotofaga, susuga i le faafeagaiga ia Karima ma le faletua ia Faaleo ma le ekalesia i Manukau, o Rev Elder Apelu Tielu ma le faletua ia Grace ma le ekalesia i Papakura, o le aulotu i Takanini ma le susuga i le faafeagaiga ia Leaia Pio ma le faletua ia Ianeta, ae lē gata i lea o le tapuaiga a susuga i faafeagaiga malolo manumalo ia Rev Tala Simanu ma Rev Matafai Alefaio ma o laua faletua ia Sailau ma Matautu.
E lua pese na fai agai i ai le tauvaga, o le pese filifilia a le aufaipese lava ia (choice) ma le pese sa tauva ai aufaipese uma o le “Pese 167 – Ina Tutu ia i Luga”. O le susuga ia Soti Lemalu Fale Faanene sa faamasinoina lenei tauvaga o se tasi o tamalii o le musika ma o loo galue fesoasoani i totonu o nisi o ekalesia i musika, ae sa ia tapenaina foi le pese o loo fai agai i ai le tauvaga.
O vaega na togi i ai lenei faamoemoe, ia paleni lelei leo, ia sa‘o le fati o le pese, ia sa‘o le faaaogāina o faailoga ma ia matala lelei le ta‘uina o upu. Sa lei faigofie i le faamasino lana galuega auā ua lelei uma tapenaga a aufaipese taitasi aemaise ai o le molimau ma le faamasino a le auvalaaulia.
O lenei faamoemoe na amata i pese lotu ae faaiu i faafiafiaga faasamoa ma faaevagelia, ae na o pese lotu lava na fai i ai le tauvaga.
O le iuga o le tauvaga na sola ai le Ekalesia PIC Manukau ma le Ipu o le Pese Faapitoa o le tauvaga ma le tuufaatasiga, ae nofo le Ipu o le Pese Filifilia (choice) i le ekalesia i Papakura, ma le Ipu o le Aufaipese sa lelei le latou faatinoina o le pese ma le kilivaina o le feau molimoli i le pese.
O nei Ipu (trophies) na saunia e le laulau a le autalavou a le matagaluega, le peresetene ia Seaga, sui peresetene ia Kitiona, failautusi ia Tilomai ma le teutupe ia Lemusu Samasoni, ae o le isi Ipu na saunia e le Ekalesia o le Satauro o le Faaolataga i Takanini.
Na taualuga lenei faamoemoe i le taumafataga na tapenaina e le ekalesia i Papakura, ma le faamoemoe maualuga o le a faaauau lava i tausaga uma lenei polokalame mo tupulaga talavou.
