(Wellington Samoan RFU Grassroots Rugby Tournaments Village Kings 15’s)

O se vaaiga mataina tele na vaaia ma molimauina i le nofoaga poo le malae Lakapi i Porirua Park i le taeao o le Aso Toonai na se‘i mavae atu nei, ina ua toe lalaga le taaloga lakapi ua fai si leva o taumafai mai e nisi o tamalii o le atunuu o loo faamautu i le laumua o Ueligitone.

O se tasi foi o tulaga maoae o le aofai o ‘Au na mafai ona tausinio i lenei taamilosaga, e 12, ma o se fiafiaga tele foi lea i le Komiti faafoe i le lagolago malosi mai o nei kalapu i le toe lalagaina mai o lenei taaloga mo alo ma fanau a Samoa i Ueligitone.

Sa amata lava i le sauniga puupuu i le tatalo, sosoo ai ma le faafeiloaiga i kalapu o le taamilosaga, ona amata loa lea i taaloga muamua i le va o Hutt Samoans ma Malie i le (Stadium) a o Maroons ma Faleata i le Malae Numera 2.

O ‘au uma nei sa tausinio ai i lenei taamilosaga: Hutt Samoans, Malie, Nofoalii, Falelatai, Siumu, Saleaumua, Apia Maroons, Faleata, Wainui Samoans, Anoamaa, Aana, Saleimoa.

Na felanulanuai togiga a ‘au eseese sa matagofie ai le malae i le Porirua Park. O tapuaiga a Nuu ma Afioaga e lē gata i lea o le toatele lava foi o le atunuu sa agai atu ma maimoaina nei taaloga.

Masalo poo le tasi i le aoauli, ona alo atu loa lea o le taamilosaga i le malologa ma taumafataga o le aoauli, ma faafiafiaga ma tufatufaga meaalofa mo le fanau laiti i le taimi tonu o malologa mai uluai taaloga o lea aso.

Ina ua mae‘a le malologa ona toe faaauauina lea i taaloga o Semi Finals ma Finals. Na faamae‘aina uma taaloga o lea aso i le taualuga i le taaloga faaiu, le Cup Final i le va o Malie ma Anoamaa.

O se taaloga mataina tele i lea afiafi a o maimoaina e le toatele o ‘Au ma i latou uma sa auai.

O tufatufaga faailoga sa faia lava i lea afiafi ma faamae‘a aloaia ai lenei taamilosaga i le Aso Toonai na se‘i mavae atu nei.

Ma faapea se faamataga o le Iuni Lakapi lenei a Ueligitone Samoa poo le Wellington Samoan Rugby Football Union na uluai faavaeina i le tausaga 1970.

O se tapenaga o loo galulue vaavaalua lelei pea ma le Iuni Lakapi a Niu Sila aemaise ai lava Iuni Lakapi a Ueligitone mo le manuia o alo ma fanau a Samoa, aemaise ai lava le faaaogāina o lenei taaloga o le Lakapi i le faaolaolaina ai o mafutaga faaleaiga, nuu ma afioaga, Ekalesia aemaise ai lava le atinaeina o le taaloga mo alo o le atunuu mo le lumanai. O se vaaiga la lenei i taaloga sa faagasolo i Ueligitone.

 

Nisi o le Komiti Faafoe a le Iuni Lakapi Samoa i Ueligitone – 2012

Faatamā: Tiatia Ieti Tiatia (Life member) ma Leasi Tommy Scanlan (Hai Komesina o Samoa i Ueligitone).

Peresitene: Toomata Frank Collins.

Taitaifono: Tunumafono Ken Ah Kuoi. Failautusi: Toleafoa Sofara.

Failautusi Lagoalago: Lili-Marina Stanley. Teutupe: Tuiafelolo Euta Afamasaga.

 

O isi sui o le Komiti: Tupai Okesene Moananu, Tuuu Kenape Faletoese, Petaia Petaia, Namulauulu Alama Ieremia.

 

E faafetaia ai lenei foi tapenaga o le toe fafaguina mai lea o lenei faagatama o le lakapi mo le lumanai o alo ma fanau a Samoa, aemaise piitaga faaleaiga, nuu ma afioaga, faapea foi Ekalesia i lenei atunuu. Faamoemoe o le a faapena ona agai pea i luma lenei atinae i lenei faagatama o le Lakapi.

 

Comments

comments