Ua toe gau lava lona vae i le Semi Final o le ipu autu o le a oo i le tini, ae soia ia e vave pe foi lona manu‘a ma toe lele mai mo le isi vae o le taitoafitu i Ueligitone.
Ua amata le 2014, ua toe faagasolo le taamilosaga lakapi taitoafitu a le IRB e pei ona faamae‘a atu le vae i Amerika mo le tolu aso i le faaiuga o le vaiaso, ma o le a taliu mai mo le faaauauina o le taamilosaga i Ueligitone i le amataga o Fepuari.
E ui ua lē au le taumafaiga a le tatou Manu Samoa i le ipu autu sa tausino uma i ai ‘au taitasi, ae faafetai o lea ua see mai i le tulaga lima i le faatulagaga o ‘au o le taamilosaga i le mae‘a ai o le vae i Vegas.
E pei ona silafia o lea ua toe siamupini foi Aferika ma o le faatolu ai lea ona umia le Ipu autu i Vegas. Peitai na mataina foi le taumafaiga a le tatou ‘au pe a fua atu i iuga o ana taaloga pool games i le faaiuga o le vaiaso, taaloga muamua na manumalo ai Samoa 22-19 ia Egelani, faavavai foi lea o Uruguay ma manumalo ai Samoa 17-12, ae lami ia Portugal i ‘ai e 35 Samoa i le leai a Potukale i le taaloga mulimuli o le Pool C.
Sao atu lea o le Manu i le Quarter Final ma taaalo ai ma Ausetalia, toe suipi ai foi Samoa i ‘ai 12-10 Ausetalia. Lea na maua ai le tatou avanoa i le Semi Final o le ipu autu ma fetaui ai ma Aferika, ae pagā lea, na gau ai lona apaau i le taaloga lea ma niniva faasoloatoa ina ua mae‘a le taaloga e leai se ‘ai na maua. Manumalo ai Aferika i ‘ai e 14 i le leai a Samoa.
E tuufesili le toatele i ata ia na tavili e le ‘au a Kanata ma le sao i le isi Semi Final o le ipu autu lea na fetaui ai ma Niu Sila, ae peitai na nenefu ai le vaai ina ua faa‘emo e Niu Sila ma manumalo ai i ‘ai e 26 i le 7 a Canada.
O le Final la lea na saili siamupini ai loa Aferika i Saute ma Niu Sila, manumalo ai loa i le ipu autu Aferika 14 i le 7 a Niu Sila.
E pei ona ta‘ua le fesiligia o le malosi o Kanata ma le sao i le Semi Final, o le fesili foi lea o loo taumate e le toatele o le tatou autapuai i le tatou taaloga mulimuli, pe na faafefea ona toe liliu e Kanata le iuga o le taaloga i nai sekone mulimuli, a o saili ai se ‘au e tulaga tolu i le taamilosaga, i le va o le tatou Manu Samoa ma Canada i le la taaloga mulimuli.
Ona pe a tagai i le faagasologa o le ‘afa muamua, na kilia mai lava le tatou manumalo ina ua 12-0 a Canada. Peitai na toe mimilo mai lava le finau mai a Canada i le ‘afa lona lua o le taaloga, toe sala ai lava Samoa i minute mulimuli o le taaloga ma kiki ai loa le sala e le alii o Phil Mack ma manumalo ai i ‘ai 22 i le 19 a le Manu Samoa.
E ui i lea, o loo iai taamilosaga e lima o loo foufou mai ma le faamoemoe o le a manuia ai taumafaiga a au tamafanau atoa ai ma se tala fiafia mo lau tapuaiga Samoa.
O le faatulagaga nei o aulakapi taitoafitu:
Team Points
South Africa 78
New Zealand 77
Fiji 56
England 53
Samoa 47
Australia 46
Argentina 43
Kenya 39
France 33
Wales 32
Canada 31
