O le vaiaso talu ai na faatoa faalauiloa mai ai le toe agai atu o Joseph Parker mo le isi ana fusuaga e faia lea i Palmeston North ia Iuni i le aso 13 e pau tonu lava i le Aso Toonai. O le alii fusu lava ia Joseph Parker na ia faalauiloaina lea tala i le au tusitala, ae lei faailoaina mai i tusitala poo ai lea o le a la fusu i lea aso.
O lenei alii fusu ua na o le 23 tausaga le matua, ua ia faalauiloaina le nofoaga i Palmeston North i le Arena Manawatu, o loo faaalia ai foi lona lagona fiafia tele ona lea faamoemoe, aemaise ai lava le toatele o tagata lagolagoina ana taumafaiga i lenei lava taaloga o faipelega poo fusuaga foi i Palmeston North.
O le taimi nei o loo tulaga 8 i le WBO ina ua mae‘a le fususaga lea na faataunuuina i Aukilani i le amataga o le masina nei, ae o loo tulaga 10 i le WBA.
E lē o faalauiloaina mai le tulaga o loo iai i le WBC ma le IBF i le tulaga o loo iai ia faalapotopoto o fusuaga i le taimi nei. O isi fuafuaga o loo faataatitiaina nei o le malaga atu lea o le alii fusu i Amerika i Las Vegas agai ifo ai i Florida mo ana toleniga e fai ai ma le alii fusu iaWladimir Klistschko mo ana sipā iina mo le tolu vaiaso.
O ni sauniuniga a le alii o Wladimir Klitschko mo lana fusuaga i le masina fou e faia i New York ma Bryant Jennings e faataunuuina i New York. Masalo pau ia o faamatalaga o lea ua tau ataata mai i lenei alo o le atunuu , ae tatou talosia pea taumafaiga ia a‘e ma le manuia faiva ma le tapuaiga a Samoa.
