O le a toe taliu fiafia mai i fanua le Under-20 a Niu Sila, ma toe faafoi mai le latou pale o loo siamupini ai pea i lenei foi taamilosaga e pei ona sa faagasolo ai i Iapani. O le afiafi anapo na suefusi ai le au a alo ma fanau talavou a Niu Sila ma le au mai Egelani, ma manumalo mamao ai Niu Sila i ‘ai e 44 i le 28 mo Egelani.
O se taaloga na iloga le faatautino ae sa matua matagofie foi i le silasila a le au maimoa e pei ona faaalia mai le televise. Atonu la ua uma nei le toe masalosalo o Egelani, aua o le tausaga foi talu ai, o laua foi ma Niu Sila na sailia e fusi lava lenei, i le taamilosaga sa faagasolo ai i Uelese, lea na manumalo ai foi Niu Sila i ‘ai e 38 i le na o le 3 a Egelani.
I le taaloga i le po anapo, na taaalo ai le toaono o tama mai le au a Egelani lea sa taaalo i le taaloga o le tausaga talu ai, ae mo Niu Sila, e na o le toatasi lava le alii mai le ‘au o le tausaga talu ai, na toe taalo i le taaloga anapo, o le uigi o Zac Guildford, lea foi na mataina lana taalo anapo, i le tataoina o sikoa e lua mo le au, faapea foi le iloga o le faafoeina o le taaloga e le alii kapeteni o le au, o Aaron Cruden.
Na iloga le malosi o le foueki a Egelani aemaise le lelei o aa i le pou a le latou fulupeki le alii o Tom Homer, ma muamua ai tau ‘ai Egelani i le 6-0, ae faafuasei loa ona toe faatoatoa lelei e Niu Sila le latou taalo ma faaitiitia le tele o mea sese, lea na amata ai loa foi ona tatafa mai ata o lo latou manumalo seia oo ai lava ina ua matua toe faamanino atu e Niu Sila i tama o le fuarosa, o Niu Sila lava e ana le ipu.
O ‘au mai Aferika i Saute ma Ausetalia na la sueina le tulaga tolu, ma manumalo ai Aferika i Saute i ‘ai e 32 i le na o le 5 o ‘ai mo Ausetalia.
