Toe foi Lima Sopoaga i le All Blacks

Lima Sopoaga
Lima Sopoaga

Atonu e sili atu le fiafia o Lima Sopoaga i le toe filifilia o ia i le ‘au a le All Blacks nai lo le toaono fou lea na filifilia mo taaloga faavaomalo a Niu Sila ma Uelese i le masina o Iuni. Na faaalia e lenei alo o le atunuu ona uiga tausaafia i le feiloaiga ma le Samoa Times, ina ua toe filifilia o ia i le All Blacks. E tolu taaloga a le All Blacks ma Uelese e faia i le malae i Eden Park i Aukilani (11 Iuni), Ueligitone (18 Iuni) ma Dunedin (25 Iuni).

Fai mai Lima na matuā faanoanoa tele o ia i le tausaga ua tea nei ina ua lē filifilia o ia i le aufili a Niu Sila mo le Ipu a le Lalolagi lea na manumalo ai Niu Sila. I le tausaga na tea nei na filifilia ai o ia i le ‘au, ae na o le tasi lana taaloga mo le All Blacks lea na fai i Aferika i Saute.

Peitai ina ua oo i le taimi o le Ipu o le Lalolagi ae lē filifilia o ia. E ui i lea ua faagalo na mea uma ina ua toe valaauina o ia e Steve Hansen, le faiaoga a le All Blacks mo taaloga amata o le tausaga ma Uelese. “Ua ou faafetaia lenei faamanuiaga. E ese foi le lagona ina ua toe filifilia a‘u mo taaloga a le All Blacks,” saunoaga a Lima i le feiloaiga ma le Samoa Times.

“O lea ua ou koleni ma le malosi auā le ausia o se avanoa ou te taalo ai i le taaloga faavaomalo muamua.” E toalua isi tama o loo filifilia i le tulaga lea e taalo ai Lima, o Beauden Barrett o Ueligitone ma Aaron Cruden o le Chiefs. O le luitau foi lea ia Lima o le tauivi lea ma Barrett ma Cruden mo le avanoa e taalo muamua ai, pe faaleoleo foi mo le taaloga i Aukilani.

Na ta‘ua foi e Lima, ua tele foi suiga o lana taalo mai le tausaga ua tea. E iai le vaai mamao i taimi o taaloga, ma le faatonutonuina o le laina i tua. Na faamaonia foi e Grant Fox le faiaoga lagolago a le All Blacks, le faamoemoeina o Lima i le ‘au ona o le lelei o lana pue aemaise le mataala i avanoa e mafai ai ona osofaia le ‘au i taimi o taaloga.

Na ta‘ua foi e Fox, o Lima o se tama taalo talenia, e iai lana kiki ofoofogia lea na fai i le taaloga ma le Chiefs i le lua vaiaso talu ai. “O le mea lelei ua ou vaaia ia Lima o le faaauau lea o le lelei o lana taalo, e ui na misia e ia le Ipu o le Lalolagi, ae ua vaaia le alualu pea i luma o le lelei o lana taalo,” saunoaga a Grant Fox.

Ta‘ua foi e Fox o loo lelei atoatoa le a‘a ma le kiki polo a Sopoaga ae o le mea tāua tele o le faaleleia atili lea o lona faatonutonuina o lana lava taalo aemaise lava le filifilia lelei o kiki eseese i le taimi e solomuli ai le ‘au ma taimi foi e osofaia  ai le ‘au.

Na ta‘ua e Fox, o mea sese a le tama taalo e iai Lima, e lē moomia i taaloga tetele, e pei o taaloga faavaomalo. Ua faaalia foi le fiafia tele o Fox i le taalo a Lima i le taimi e osofai mai ai le isi ‘au, ua vaaia le agai mai i luma e faafetaui osofaiga e ala i lana pue malosi.

O se tasi o itu lelei o lana taalo, o lana osofai mai lea i le autafa o sikalamu ma molo. O Sopoaga o lona tamā o Ene Sopoaga o loo aumau i Ueligitone, o ina foi sa fanau ai o ia, a o lona tina o le tamaitai mai le Atu Kuki.