Ua mae‘a nei le faiga filifiliga a Samoa, ma ua manino mai ai foi le itu faaupufai o loo agai pea i ai le lagolago a le atunuu, le HRPP. I le matau atu i le iuga o le faiga palota e pei ona faamauina i le itulau , e latalata lava le aofai o sui o le HRPP o loo faamanuiaina mai, i le aofaiga sa muai faailoa e le taitai o le HRPP, le afioga i le alii Palemia, Tuilaepa Lupesoliai Sailele Malielegaoi, lea na ia ta‘ua ai le ono manumalo o le latou itu i nofoa e 40 o le Palemene.
I le iuga ua faamauina nei mai le uluai faitauga o le faiga palota, o loo tulai mai ai, e 36 nofoa o loo manumalo ai le HRPP, i nofoa e 13 mo le vaega faaupufai a le Tautua Samoa.
O le aofai lena o loo iai i le taimi na tuuina atu lenei lipoti, ae o le vaiaso fou lenei ua amata, o le a toe agai ai loa le ofisa o loo faamaumauina le faiga palota, mo le latou faitauga faaiu, ma faamautinoa ai loa le iuga mautu o lenei faiga filifiliga a le atunuu.
Afai o le a iu ane lena faitauga faalua poo le faitauga mulimuli ma o loo tumau pea le aofai o nofoa o le Tautua e pei ona iai nei, lona uiga ua mautinoa mai ai foi, le aloaia o le latou vaega faaupufai i le avea ai ma vaega e Agaia le Malo, auā i le taimi nei o lea ua silia ma le valu o latou sui auai, o le aofaiga lena o sui e faamaonia ai e tusa o poloaiga tumau o le Maota Fono.
E mataina nisi o suiga ua tulai mai i lenei foi faiga filifiliga mo le isi lima tausaga, auā o loo matauina pea le amata ona tulai mai nisi o sui o loo talavou pea le soifua, ae ua tusilima i ai le mamalu o afioaga ma itumalo, e avea ma o latou sui i totonu o le Palemene o Samoa.
Tagai ane i le atoaga o lenei lipoti, e pei ona tuufaatasia ai e la tatou nusipepa le lisi atoa o suafa o i latou sa tausinio mo le faiga palota a Samoa i lenei tausaga, 2011, ma iuga o a latou faiga palota e pei ona iai i le uluai faitauga o le palota.
