Toe foi le Pasifika Festival i Western Springs

Faafiafiaga suifefiloi sa faatinoina i lea aso - Photos: Fata Tuialii
Faafiafiaga suifefiloi sa faatinoina i lea aso – Photos: Fata Tuialii

Ua toe pepese fiafia le au fai faleaiga ma tagata faipisinisi i le itu i Sisifo o Aukilani ina ua vave ona toe foi atu le Pasifika Festival i Western Springs e toe faaauau ai, e pei ona masani ai i tausaga taitasi.

Talu ai o le maua ai o le lago i lea nofoaga na mafua ai ona see mai i Manukau i le tausaga ua mavae, ma o se faanoanoaga tele lea sa iai i nisi o i latou sa aumau i le itu i Sisifo i le la tausaga ona ua mamao ma latou ae lē gata i lea ua misi ai foi le tele o turisi e agai atu ma faaalu a latou tupe i pisinisi i lena itu o Aukilani.

Ae o le Aso Toonai 12 ma le Aso Sa 13 o Mati i le faaiuga o le vaiaso na toe pepese fiafia ai ma tumutumu i Western Springs tagata eseese o le Pasefika e agai atu e maimoa ma matamata i faafiafiaga eseese ae lē gata i lea o oloa sa mafai ona faatauina ai faapea ma taumafa. Na suifefiloi gagana faapea tu ma aga a atunuu eseese ae faapea foi i le felanulanuai o le tele o taumafa na faatauina e le au fai faleaiga.

E ese mai lava Samoa i atunuu uma, auā e toatele ona tagata e fiafia e lagolago aemaise ai o faafiafiaga eseese mai faalapotopotoga ma ekalesia. Soo se tauaofiaga a Samoa e tatala lava i le sauniga lotu lea sa avea ai le susuga le faafeagaiga ia Lokeni Matamu ma ositaulaga i lea taeao o le Aso Toonai na te molimoliina le faafetai ma le viiga i le Atua, ona sosoo lea ma le sisiina o le fu‘a o le malo o Samoa e le Miss Samoa NZ le tamaitai ia Christina Taefu.

Le tausala Samoa NZ, Christina Taefu - Photos: Fata Tuialii
Le tausala Samoa NZ, Christina Taefu – Photos: Fata Tuialii

O le autalavou a Malaeola Katoliko sa nafa ma le tapenaina o le ‘ava o le feiloaiga e pei ona masani ai, ae o le susuga ia Lemoa Henry sa fai ma fofoga o le polokalame. Sa maualuga ma matagofie lenei faamoemoe ona sa mafai ona asia e le Amepasa o Amerika le susuga ia Mark Gilbert ma lona faletua ia Nancy faapea le Consual General o Amerika ia Ms Melanie Harris-Higgins faatasi ai ma le pulenuu o Aukilani ia Len Brown le fata a Samoa, ma o le atunuu muamua lea sa asia e le asiasiga i lea taeao o le Aso Toonai.

O se tasi vaaiga sili ona mataina i lea taeao o le susuga ia Suluape na ia taina nisi o tatau ma malu a o maimoa le toatele o le atunuu ma turisi.

O faafiafiaga eseese na sausaunoa ai le Miss Samoa NZ le tamaitai ia Christina Taefu, Le La o Samoa, Pacific Elvis, Vanni Su‘a, Lil Saints Dance Crew, Boom Bullet, Kweenz, Kids Dance Pacific, ma le tele o isi faafiafiaga sa iai lo latou sao i le fata a Samoa. O le polokalame na amata i le ‘afa o le sefulu ae tapuni i le 5 i le afiafi.

O se tasi itu tāua na maitauina i lea aso o le vevesi atu o tagata matamata ua leva ona sasala le manogi o kuka eseese a faleaiga Samoa, sa faatauina ai le tele o

Komiti faafoe o le fata a Samoa - Photos: Fata Tuialii
Komiti faafoe o le fata a Samoa – Photos: Fata Tuialii

taumafa Samoa, ae faapea foi i pisinisi sa faatauina a latou meataulima Samoa ma lavalava Samoa sa vaaia foi le toatele o tagata palalagi sa faatauina mea taulima e teu ai o latou fale.

O le tāua o lea polokalame o loo mafai ona faailoa ai le tele o measina a le atunuu faatasi ai ma le faatāuaina o lana lava gagana Samoa e pei ona amata aoaoina ai le tama ma le teine Samoa.