Toe foi i Vaitele-tai le ofisa Faalapotopotoga o Eleele a Samoa

Mai le maota o Hanna Leung Wai i Apia lea ei gauta o le maketi i Fugalei sa iai muamua le ofisa tutotonu o le Samoa Land Corporation poo le Faalapotopotoga o Eleele o Samoa le SLC, ona siitia atu lea i le nofoaga sa faavae ai le faalapotopotoga o le siosiomaga o le Pasefika le SPREP.
Na tuanai lea o ni tausaga se tele siitia loa i Tuanaimato i lona ofisa fou i totonu o le malae tapolo o loo iai le Tuanaimato Golf Course.
Peitai o le faitau miliona o tupe na fausia ai le nofoaga tutotonu i Tuanaimato, ua faia se isi faaiuga a le Malo e ala i le Komiti Faafoe o lea faalapotopotoga, ina ia toe siitia i le fogafale i luga o le maketi i Vaitele-tai, ae faatau le ofisa i Tuanaimato ina ia avea ma faletalimalo.

O le vaiaso nei ua amata ai le tautua a lea faalapotopotoga o le Malo i lea nofoaga, ae tuu atu loa le ofisa i Tuanaimato i se pisinisi latou te faagaioia o se faletalimalo. Ua tapunia tauofoga mo lea faamoemoe ma e na o le tasi le tusi ofo na tuuina atu mai se tasi o pisinisi faletalimalo i Samoa o loo faipaaga ai ma se tagata faipisinisi mai Saina.

Na faaalia e se molimau faatuatuaina, o le a faatau i se pisinisi le maota tutotonu o le SLC i Tuanaimato mo le faagaioia o le faletalimalo ae o le fanua o se meatotino a le Malo o le a lisi.

O le a toe maua ai nisi seleni a le faalapotopotoga e faaopoopo i ana tupe maua, e pei ona faaalia e le molimau o se fuafuaga na faia muamua ia faatelē le maota ina ia mafai ona iai ma se potu fono ma nisi vaega mo auaunaga tau taligamalo.

E pei ona silafia o le lipoti a le suetusi sili a le Malo lea ua opea i le Palemene ma ua talanoaina foi, o loo laga ai nisi o faaletonu i le pulea o aseta a le faalapotopotoga ma le faaaogāina o ana seleni. O se lipoti o loo tusilima ai le suetusi sili a le Malo i le lē lelei ona pulea nisi o galuega ma sa faitioina ai foi le faalapotopotoga i le tuai atu o ana lipoti faaletausaga i le Palemene.

O le afioga Afoa Peseta Arasi Tiotio o loo avea nei ma Pule Sili o le faalapotopotoga, ma o loo faasino i ai se faitioga a se tasi o faipule sa avea ma minisita o Tupe a le Malo e faatatau i nisi o faaletonu o loo ta‘ua i le lipoti a le Pule ma le Suetusi sili a le Malo.

O le taimi foi o avea le afioga Faumuina Tiatia Liuga ma Minisita o le faalapotopotoga o loo tuua‘ia ai foi i le lipoti a le suetusi sili.
Le maketi i Vaitele-tai ua iai nei le ofisa tutotonu o le Samoa Land Corporation poo le Faalapotopotogaa o Eleele o Samoa le SLC

Le nofoaga tutotonu o le SLC i Tuanaimato lea ua faatau atu i se pisinisi e fai ai se faletalimalo