Ua faaopoopo le numera o tagata o le afioaga o Lalomanu ina ua toe foi mai nisi o aiga aemaise o tagata na galulue i Amerika Samoa i le Samoa Packing, le fale faigaluega tele lea e tusa ma le to‘a 2,000 ona tagata faigaluega ua faamalolo ina ua tapuni galuega a lea kamupani tele i Amerika Samoa.
I le aofai e latalata i le to‘a 2,000 na manino ai o le tusa ma le 80 pasene o lea aofai o tagata na malaga atu i pepa faigaluega i Samoa nei.
O le toatele lava na fananau ai o latou alo i Amerika Samoa ae talu ai o lea na nonofo i Amerika Samoa ona o pepa faigaluega, e tatau ai lava ona toe foi mai i Samoa nei auā ua lē o toe iai le galuega lea na faaauau ai pemita e nonofo ai i le motu i Sasa‘e.
O lea la ua amata ona vaaia le gasolo mai o ia aiga i Samoa nei. O Lalomanu lava ia i Aleipata e tusa ma le lima aiga ua agai mai i le teritori.
O Setema o le tausaga na tea nei na tapunia ai lenei kamupani ma sa tālia e le toatele a latou lafoga e toe totogi mai e le Malo ona faato‘ā agai mai loa lea i Samoa.
O le toe foi mai o nei aiga ua saga faaopoopo ai ma le numera o tagata Samoa o le a faapea ona saili galuega. O le vaiaso na tea nei na feiloai ai le Kovana o Amerika Samoa, le Afioga Togiola Tulafono ma nisi e fai pisinisi i le i‘a i Hawaii.
Talu lava ona tapunia le Samoa Packing na faapea loa ona saili le ta‘ita‘i o Amerika Samoa mo se auala e mafai ai ona toe faaauau e le Malo lenei pisinisi tele.
E lei talia e le Senate o Amerika Samoa lea talosaga i le tausaga na tea nei ina ua lāgā e le Kovana le tāua tele o le vaavaai i auala e tumau ai aseta a le Samoa Packing ia ua lē toe faaaogāina aemaise o le fale atoa ina ia mafai ai ona faaauau lea fale faigaluega.
O loo iai lava la le manaoga o le Kovana ina ia mafai ona toe faatino lea galuega tele. O le faatonuina o Amerika Samoa e le Malo Tele o Amerika ina ia sii le totogi amata o tagata faigaluega i le teritori mo le isi tolu tausaga, na see ese ai loa le Samoa Packing ona o le manatu e lē mafai ona maua se tupe mamā a le Kamupani pe afai e faatino le siitaga o le totogi amata e pei ona aiaia faaletulafono e Amerika.
Ua toe foi nei la lea kamupani i Amerika ma ua faaauau ai le tuu apa o i‘a e pei ona vaaia i Amerika Samoa i tausaga ua tea.
