Ua savali nei le ono masina e lē o mafai ona tuua Samoa e le alii o Oliver Sammy Chong Nee e nofomau i Niu Sila ma ona mātua ma lona aiga ae ua siitia Oliver ma faamautu i Ausetalia.
Ole malaga muamua mai ale taulealea i Samoa auā na fanau ma ola a’e i Niu Sila na ia faia ai se gaioiga solitulafono, ole ave faagaoi lea ose pikiapu fou ase tagata na tu i luma ole faleoloa o Farmer Joe i Siusega.
O Oketopa ole tausaga ua mavae 2018 na faia ai e Oliver lea gaioiga, ma ole taavale na faaolaola e le tagata na alu atu ai, ae alu ile faleoloa e faatau se pusa asikulimi e momoli ai le keke ole aso fanau ose tasi o lona aiga.
Na faaola le taavale ae alu ile faleoloa le tagata e ana le pikiapu. Ole faamatalaga a lē e ana le taavale na faaola lona Sa ma faaola le ea malulu ina ne’i liu suavai le kulimi ole keke.
Peitai ole avanoa lea o Oliver na ia oso ai ile taavale ma alu ai a’o iloa ane e se tasi e fai sana laulau faatau i luma ole faleoloa. Na matuā tetee malosi Oliver i moliaga e tolu e aofia ai le gaoi ma ave faamalosi se meatotino, ave ole taavale ise tulaga na lamatia ai le saogalemu o isi tagata ma taavale feoai, ma le moliaga ole lē usitai i leoleo.
Na mae’a suesue molimau a leoleo ma aumai le faaiuga e faamaonia uma solitulafono ma sa fautuaina e le itu a leoleo se faasalaga faafalepuipui.
Ina ua aumai le faasalaga ale faamasinoga ua sala tupe Oliver ile 3 afe tala ma le faaiuga e lē talafeagai se faasalaga falepuipui. Ua mafua lea faaiuga ona ua aumai le lipoti ale fomai e iai aafiaga ole mafaufau o lē ua molia.
Na faailoa e lē ua molia na umi se vaitaimi e lei toe inuina ana fualaau ma faia ana siaki faafomai ona o ona aafiaga ole mafaufau. E 24 afe tala le tau o mea faaleagaina ole taavale na sola ai Oliver. O lana solaaga na alu ai faatū le taavale ile latou aiga i Aleisa ae ina ua logoina leoleo ma alu le tuliga poo fea o iai le taavale, na faaalia e leoleo na iloa ane loa leoleo e Oliver oso loa ile pikiapu ma alu ese ai.
Ose aualatele e ui i totonu o Aleisa e alu ise faatoaga na tuliloa atu ai e leoleo le alii. Na uma le auala oso loa le pikiapu na gaoi e Oliver i totonu ose pa povi. E lei kea Oliver ae na faaalu ai i totonu ole pa povi le pikiapu.
Ole uso o lē e ana le pikiapu na alu atu ai foi ma ia ma lana taavale ile tuliloaina o Oliver peitai na faaalia e leoleo e lei kea foi iai lē ua molia. E tiga ona vaai ane ile taavale ae soso’a lava e Oliver ma afaina ai le taavale ale uso o lē e ana le pikiapu.
Ua faatonuina e le Faamasino sili le taulealea ia totogi muamua lana salatupe ona faatoa mafai lea ona alu ese ma Samoa. E 12 afe se tupe na totogi muamua e Oliver mo le faaleagaina ole pikiapu na ia gaoia ma sola ai. E 39 tausaga ole soifua o Oliver Sammy Chong Nee.
