O lo tatou Atua o le Atua fai vavega, o le Atua silisiliese, o le alofa mutimutivale lava ia, o lo tatou olo puni matagi ma lo tatou talita.
Sa soona nunumi le lalolagi ae o ana fetalaiga ma saunoaga na mautu ma lelei ai ma maua le ola.
E lē o toe po malae i le silafia o le atunuu i luitau o le soifua sa feagai ma lenei tamalii iloga o Samoa i le taleni pese le susuga ia Felise Mikaele, e pei ona aafia i le gasegase o le stroke i le amataga o le tausaga na mavae atu.
Na faatonuina ai e fomai ina ia fai loa sina malologa mai le pese ma le faafiafia mo se tausaga, ma o le masina o Iuni o le tausaga lava talu ai na malaga asiasi mai ai Asuao i le aai o Melepone ma maua ai le feiloaiga, ma maitauina ai le tulaga ese sa iai lona soifua ona o le ma‘i.
Peitai i le mavae ai o le tausaga talu ona malolo na toe maua ai le fesootaiga i lona toe malaga tafao i le aai, a o le taimi tonu lea o loo tapena ma sauni le paia o Samoa i Melepone faapea le Fono Faufautua mo tagata Samoa i Vitoria mo le taaloga a le Samoa
A ma le Rebels, na tau saili ai nisi o aufaafiafia mo le faamatagofieina o le faamoemoe e ala i la tatou gagana laei ma taumafa, aemaise o tu ma agaifanua ma faafiafiaga faa-Samoa, na momoli le tuualalo ia Asuao poo le ā sona finagalo i sona sao mo le faamoemoe pe a ua tusa ma lona malosi faafoisia e le Atua, na ia talisapaia ma le agaga faafetai le faatalauula ma toe malaga ai i Uelegitone e sauni mai ai.
I le aso la o le taaloga na toe faafofoga ai Samoa uma na aofia potopoto i le malae o le AAMI Park ae tainane luga o peau ma galu o le ea i leitio ma televise, ina ua toe tatala le siufofoga o Asuao i le usuina o le “Tama Samoa” le pese ua logologoa ai lona suafa e pei ona ia fatuina mo le tatou Manu Samoa.
O le itu uigaese na maitauina i le malae, e lē gata o le toe faafouina o lona siufofoga, ae o lona malosi foi e pei ona silamaimoa le atunuu i lana siva tamoemoe i le malae ae o lana saasaa faafetaui ma siva a tausala o le Nesianpearl na aiaiuli i lana faafiafiaga.
O le molimau a Samoa uma na maimoa i le faamoemoe, ua sili atu le siufofoga ma le malosi e pei ona vaaia o Asuao nai lo le taimi a o lei gasegase, maua le feiloaiga ma Asuao ma ia saunoa ai ua aoga le malologa sa fai, lea ua toe oso le moemoe fou o lana taleni ua matuā lagona foi lona malosi atoatoa.
Ma ua toe amata lalaga atu ai i Melepone lana taleni mo le faafiafiaina o Samoa atoa i tulimanu e fā o le kelope, na ia saunoa foi mo lenei tausaga atoa, a faafofoga le atunuu ua ia asia lo tou aai, afifio ane ma talaaao ane e lululima ma feiloai, ma faafofoga i vavega o le Atua ua toe faafoisia ai lona malosi e tautua ai Samoa.
