E lei mafai ona taofiofi loimata o le alii o Jonathan Ezekia Nye ina ua faamatala e lona tamā ia Roger le mafuaaga o le latou malaga mai i Samoa nei. O le sailiga o le tina na fanaua lenei alii ma vaetama atu ai i Amerika i le ulugalii Nebraska o Roger ma Caroline Rye, o ni tagata musika na saili i le Pasefika mo se la fanau.
O le polokalame a le FOC (Focus on Children) lea na faatautaia le vaetamaga o le alii o Jonathan a o pepe ma o le 11 o tausaga talu ai na malaga mai ai lea ulugalii ma faamautu ai pepa o le vaetama atu o lenei tamaitiiti ae faatoa ono ona masina.
E lei iai se feiloaiga ma le tina moni o le pepe, ae na o le igoa lava o Maria lea na o la maua ma o le igoa lava lea na amata ai sailiga a lea ulugalii a o tuputupu a‘e le la atalii ona o le lagona, e tāua tele le iloa e Jonathan poo Zeek e pei ona valaau ai, o lona tupuaga ma lona faasinomaga.
“O ia o le Samoa ma o le ma taumafaiga mai i lona laitiiti ia iloa e Zeek Samoa ma ia malamalama i le atunuu e sau ai,” o se faamatalaga lea a lona tina ia Caroline.
Faaalia le ootia o le tamā o le aiga ia Roger a o faamatala le see ese ma Nebraska ae nonofo i le setete o New Jersey i le agalelei atu o le Atua ma mafai ai ona maua le fesootaiga ma nisi sa galulue mo le fanau na vaetama atu i Samoa.
O le fesootaiga lea na oo mai ai le sailiga i le Toomaga mo ē Puapuagatia ma tali atu ai i le maua o Maria le tina o le alii o Zeek.
Na faapea ona manatu le ulugalii e aumai loa le la atalii a o maua le avanoa ina ia feiloai i lona tina aemaise o lona aiga i Samoa ma o le lua vaiaso lea na mae‘a i le vaiaso na tea nei na faamautu ai loa lea fesootaiga ina ua malaga mai Roger ma Caroline ma le la fanau e aofia ai Zeek e feiloai ai Maria Kalepo o Tuanai, le tina moni o lenei tamaititi.
E toafitu ona tei i Samoa nei ma o loo tausi lava e lo latou tina ona ua tetea mātua o lea tamaitiiti.
Sa faafetaia e lenei ulugalii le fesoasoani a le Toomaga mo ē Puapuagatia aemaise o le agalelei o le Atua ua manatu i laua ua taitai mai le latou faigamalaga i Samoa nei.
E tele fuafuaga a lenei aiga i le lumanai ina ia mafai ai ona faaauau lenei fesootaiga, ma na ta‘ua e le tamā ia Roger, e leai se faamatalaga e manatu i laua e tatau ona nanā mai i le la tama ona o le alolofa i ai ma e ui o lea ua feiloai atu lenei tamaitiiti i lona aiga i Samoa ua malamalama foi ia i lo latou aiga i Amerika ma e tuu lava le avanoa ia te ia e matua ma agai mai ai i Samoa nei.
E telē se galuega a le aiga o Roger ma Caroline na faia i le vaetama atu ai o Zeek ona e avatu e pipio i totonu ona vae ma na ta‘ua e lenei ulugalii, o se fomai matua e faapitoa lona tomai i le togafitia o faafitauli faapea na alu lelei le lua masina o feagai ma togafitiga o vae o Zeek seia oo lava ina toe sasa‘o lelei.
Ta‘ua e le tamā ia Roger, e tele fuafuaga tetele a le Atua mo le la atalii ma atonu o le mafuaaga lea ua toe aumai ai lava le la tama i Samoa ona o le manaoga o le Atua mo le latou aiga ia faasoa pea le alofa o loo maua mo isi. O le la tama lona lua o se teineititi mai i le atu Malesala.
Faaalia e le Toomaga mo ē Puapuagatia, o le lona ono lea o fanau na vaetama i lalo o le polokalame lenei ua taofia a le FOC ua toe foi mai ma fesootai ma mātua ma aiga i Samoa nei ma o loo loma foi se malaga a se isi foi teineitiiti na vaetama i Amerika a o pepe ae ua iai foi le manaoga o lona aiga i Amerika e malaga mai ina ia mafai ona feiloai atu i lona aiga ma ona mātua na fanau mai ai.
Faaalia e le Peresetene o le Toomaga mo ē Puapuagatia, o le matagofie o nei feiloaiga ua mafai ai ona mulimulitai aiga i Samoa nei i le atinae ma le manuia ua iai fanau na mafua ona vaetama ona o le manatu ia maua e i latou se isi olaga e sili atu nai i lo le olaga e mafai e mātua i Samoa nei ona ofo atu mo nei fanau.
