Toe foi ane le loia a Toluono Feti

E tasi lava le aso o le a toe faaauau ai le suesueina o le mataupu o loo molia ai le tofa Toluono Feti, ua na o le Aso Lulu o le vaiaso nei, aso 18 o Ianuari 2012.

O le aso lea ua atofaina e le faamasinoga, ina ua faailoa ane le toe foi atu o le alii loia o Toleafoa Solomona Toailoa e faaauau ona finauina le tetee a Toluono i moliaga e lua o le faia o ni auala faaalatua i le faatauina o fanua o umia saoloto o le tina matua o Theresa Stowers ma le tina talavou o Rosita Stowers Bourke.

O le Aso Gafua, aso 9 o Ianuari 2012 na valaau ai le mataupu i se faatulagaga faapitoa ona o le taimi lea e lei amatalia galuega a le faamasinoga mo le tausaga fou.

O le valaauga lea na oo atu ai le tamaitai loia o Rosella Papalii ma ia faailoa i le faamasinoga le toe foi atu o Toleafoa e faaauau le mataupu ma tauave le itu a Toluono Feti.

O taualumaga o le faamasinoga i le vaiaso faaiu o galuega o le tausaga ua mavae, le vaiaso lea o Tesema a o lumanai le Kirisimasi, na teva ese ai le alii loia ma taualumaga a le faamasinoga.

Na mafua le teva o Toleafoa Solomona ona ua lē fiafia i le alii faamasino o Pierre Slicer i le faatautaiga o le faamasinoga, a o faia le molimau autū a leoleo le tina o Vaselisa Stowers.

Na alu ese le alii loia ae sa ia faailoa ane i le faamasinoga e ala i le tofa Toluono, e lē toe foi atu e faaauau le mataupu pe a lē suia se faamasino, ma ia faaleaoga taualumaga ua mae‘a ae toe amata.

E lei talia e le alii faamasino o Slicer lea manao o le alii loia. Na fautuaina e le alii faamasino Toluono ia oo i lana loia ma faailoa i ai, e lē toe faamutaina taualumaga a le faamasinoga ona e leai se mafuaaga tatau. Sa faailoa foi ia Toluono ia sauni e saili se loia e tu mo ia, poo le alu ane loa e tulai lava ia mo ia.

O le mafuaaga lea na toe tolo mai ai i le masina o Ianuari le mataupu se‘i faatali se tala atu a Toleafoa Solomona, lea ua tali ane nei o le a toe afio atu e faaauau le mataupu.

O loo fuafua o taualumaga i le Aso Lulu, aso 18 o Ianuari o le a tulai ai Toluono mo lana molimau, ma o loo iai le fuafuaga na pau lea o le molimau a le itu tetee, ma o le taualuga foi lea.

O le Aso Tofi, aso 19 o Ianuari e tuua ai Samoa e le alii faamasino o Slicer, ma lona aiga mo malologa i Ausetalia. E iai le faamoemoe o le tau amataga o Mati e toe foi mai mo le faaauauina o galuega, lea o le a toe fofoga ai ma le mataupu i moliaga o Toluono, lea e iai le talitonuga o folasaga ma finauga faaiu a loia o le a sosoo ai, ona iloa ai lea o se aso e aumai ai se faaiuga pe faamaonia pe leai moliaga o le tofa Toluono Feti.