E lē o mautu lelei mai i le taimi nei le aofaiga o sui tauva o le a finauina le nofoa o A‘ana Alofi 3, ae na o tala sala tua e aave mai i ‘ave o le matagi e faapea, e toatolu ni sui o le a taufetuli auā se tasi e nofoia le nofoa o le itumalo mo upufai a le atunuu mo le isi lima tausaga o le paeaiga.
E lua sui o Fasitootai o le afioga ia Afamasaga Riko Tupai ma le afioga ia Tuala Lologa faatasi ai ma le afioga i le faipule o Satapuala o loo pale mai i le nofoa i le taimi nei, le afioga ia Toeolesulusulu Cedric Pose Salesa Schuster. Na saunoa le afioga i le faipule o le a maua le faamaninoga atili o sui pe a mae‘a ona resitala sui tauva o itumalo taitasi.
O le afioga ia Toeolesulusulu sa auai i le vaega faaupu fai a le Tautua Samoa o loo agaia le malo i le lima tausaga o lana nofoaiga. Ma e tele ni galuega lelei sa ia finauina mo le lelei o lona nuu ma lona itumalo e pei o le faaleleia o eleele i totonu o Satapuala ma Satuimalufiufi talu ona aveeese mai i pulega a Amerika ma Niu Sila, o se mau ua leva ona taumafai mai ai lea itumalo, ae sa toe lalaga e le afioga i le faipule ia Toeolesulusulu Cedric lea vaega ina ua pale mai le nofoa mo lona itumalo ina ua ia silasila ua tupu le nuu.
Ae lē gata i lea e tele auala sa lē lelei le feagaiga sa foai ai eleele ma o se galuega tele o loo ia taumafai ai ina ia toe manuia le nuu i ana meatotino. Ae e ese mai ai nisi o atinae taitasi e pei o le faaleleia o auala, ma le vai.
Na saunoa le afioga i le faipule e toatele nisi o itumalo sa talosaga auala i nisi o paeaiga muamua a o lea faatoa oo i ai le malo e faaleleia i lenei 5 tausaga, ma o lea ua taoto ai foi le talosaga mo le itumalo o A‘ana Alofi 3 mo ona auala. O loo faagasolo foi le faaolaina o le eletise mo aiga o loo fia manaomia lea fesoasoani.
Na iai nisi vaega o le pitonuu o Satapuala ma Faleatiu sa faaletonu le suavai lea sa ia tapa ai le fesoasoani mai atunuu i fafo auā e leai se vaega tupe a le malo e foia ai lea faafitauli. Sa ia silasila foi i le manuia o fanau o le itumalo, ma na ia aumaia ai nisi o fanau mai Amerika e avatu e faamasani i Samoa ma faalautele le malamalama o fanau Samoa i mafutaga faapea, auā o fanau o le lumanai manuia lea o le itumalo ma le nuu.
Ua toatele foi nisi o alo ma tamafanau o le itumalo ua maua galuega i le malaevaalele, auā o loo ave lava i ai le faamuamua, faatasi ai ma taaloga o loo finauina foi lea vaega ina ia faaaogā ai le taleni ma le meaalofa o loo i fanau.
O nei taumafaiga uma sa galue ai le afioga i le faipule i le lima tausaga, ua iai nisi o galuega ua mafai ona faataunuuina lona faatinoina e pei o le vai lea sa tali atu ai le malo o Niu Sila ma Amerika e fesoasoani atu ai, a o nisi galuega faaleleia sa taumafai lava e faatalatalanoa le malo ae peitai e lē o mafai ona faatinoina i le taimi nei ona e vaivai le tamaoaiga a le atunuu.
Ma ua ia lagona e faaauau pea lea taumafaiga mo lona itumalo pe a toe manuia le taumafai i le faiga filifiliga a le atunuu o loo loma nei.
Ae na saunoa le afioga i le faipule i aitalafu a le malo o loo i atunuu i fafo, auā o le tasi lea vaega o loo atugalu ai le atunuu i le tele o vaega tupe a le malo o loo nonō mai atunuu i fafo pe gafatia ona togitogi, ae na faaalia le finagalo a le faipule, o le tausaga e 2,000 e tolu selau miliona le aitalafu a le malo sa iai i atunuu i fafo, a o lea ua oo mai i le faaiuga o le tuasaga ua mavae ua silia ma le 1.1 miliona tala.
O nei vaega tupe tetele o loo faaalu lea i le fausiaina o fale tetele a le malo, ae leai se vaega tupe o faaalu mo atinae o faatoaga e galueaina e toe maua mai ai nisi tupe a le malo.
E selau miliona o loo mafai ona totogi e le malo mo ana aitalafu i le tausaga, ma o loo gafatia ona totogi le aitalafu ae o le faafitauli o le safa ai o le atunuu. Ua finauina ai foi e le vaega faaupufai a le Tautua ina ia taofi atinae tetele ia a le malo ae fausia ni atinae e maua ai galuega e manuia ai aiga nuu ma itumalo.
O le anavatau a le Tautua Samoa o le taumafai ia faalelei le atunuu, ma o le mafuaga foi lea ua ia filifili ai i lea vaega faaupufai i lona lima tausaga auā e sa‘o le mea o loo finau ai mo le manuia o le atunuu. O le tele o manuia o faipule o loo maua e sui a le HRPP ae e lē o popole ai sui faipule a le Tautua Samoa i lea vaega auā e tatau ona manuia uma tagata lautele i lea faamanuiaga.
O le faaiuga o le vaiaso ua mavae na taunuu mai ai i Aukilani le afioga i le faipule ia Toeolesulusulu Cedric i le faataunuuina o lana sailiga seleni auā le toe tapena atu i le finauina o le nofoa o A‘ana Alofi 3.
Na molimauina le tumutumu ai o le hall a le King i Richardson Road i le afiafi o le Aso Toanai 23 o Ianuari i aiga, uo ma ē masani aemaise o sui o le itumalo na agai atu ma apogi le faamoemoe a le afioga i le faipule.
O le Fofoga o le aso o le susuga ia Finau Tiumalu Max. Ae o le agaga fiafia ma le faagaeetia o le faipule i lea po ona o le taupati atu o le itumalo e tuu atu lo latou tau‘au e fesoasoani ai i lona faamoemoe.
